Ikiortitut atorfinittut aamma perorsaasut inissaannik neqeroorfiginninneq, suliffigissaaneq, nunat allat naapeqatigalugit isumasioqatiginninneq, NPK-mut aningaasarsianik qaffaanissamut naapeqateqarnerit ilaatigut Qeqqata Kommuniata meeqqerisussaaleqineq pillugu iliuuserisaasa ilagaat.
Meeqqerivinni suliffigissaaneq kommunalbestyrelsip akuersissutigisaasa ilagaat, tamannalu siornali ingerlanneqartoq meeqqeriviit allaffiani pisortap oqaatigaa.
- Siornamiit maannamut suliffigissaanerit ingerlattarpagut soorlu una qaammat aamma Sisimiuni meeqqerisut tamaavimmik Taseralimmi ulluni marlunni naapeqatigigigut, tassani isumasioqatigiillutalu pikkorissaaneq ingerlapparput. Isumaqarpungalu tamanna ajunngitsumik ingerlasoq, taammaattorli meeqqerisunik katillugit 72-inik suli amigaateqarpugut, Sisimiuni meeqqeriviit allaffianni pisortaq Navarana Lennert-Andersen oqarpoq.
Qeqqata Kommuniani nunap sinneratuulli meeqqerisunik amigaateqarpoq, tamannalu assigiinngitsutigut iliuuseqarfigineqartartoq ilaatigut Nunatsinni Perorsaasut Kattuffiannut akissarsiatigut aamma isumaqatiginninniutaasarpoq.
- NPK-mut naapeqateqaraanngatta akissarsianik qaffaanissamik noqqaassuteqartuaannarpugut, taakkumi uagut toqqaannaq iliuuseqarfigisinnaannginnatsigit kattuffik aqqutigalugu iliuuseqartarpugut, annikittumilli qaffaaneq pisaraluarpoq, takusinnaavarpulli inuuniarneq akitsoriartortillugu akissarsiat malinnaasinnaanngitsut, Navarana Lennert-Andersen oqarpoq.
Sisimiuni meeqqerivinni sulisut 59-it amigaatigineqarput, nunaqarfiit tamakkeqqaput, Maniitsumi 13-it taassumalu aamma nunaqarfiini meeqqerivinni sulisut tamakkeqqallutik.