Ammartakkap sisamaat - Hans Christian Svärd

Meeraaninni juulleriartornera aamma juulli qanoq eqqaammasaqarfigaagit?

Juulli nuannersutut eqqaamasaqarfigivara, puujunaannerpaatsittarpara tassa juulli meeqqat ulluattut oqariartuutigineqartarmat. Meeraallungalu tamanna assut misiginikooqaara. Juulli nuannersorsuarmik meeraqatikka, kammalaatit, illooqqallu peqatigalugit juulleriartornerani juullimi silatangiaasaqattaarnerit ilaatigut unammisarluta kina pitsaanerpaanik/pissanganarsinnaasumik pissarsinersoq, pinnguarnerit aammalu tunissutit juulliaqqap ullaavani nuannersumik eqqaammasaqarfigaakka.

Meeraalluta ullaakkut poortukkamik ataatsimik ammaasinnaasarnerput, sinnerilu unnukkut orpik kaavereerutsigu aatsaat ammartarlutigit, taamaammat ullaakkut poortukkat qatanngutigiilluta anginersiortarpagut 😃
Puujunaannerpaallu ilaat juulliaqqami nukaralu iterpugut poortugaq angingaatsiartoq takusarput siullertut ammarparput, sunaaffa sisoraatit marluuttariaq aquutsitalik. Pileringaarluta neripallariarluta ulloq naallugu aneerpugut sisoraqattaarluta. Ullorli naanngittoq apussarinnersiorluta ingerlalluta sukavataartumik sisunitsinni, sunaaffa qimminut pituffiliaq savimmineq apummik asseqqasoq. Taannaqqissaaq aporujussuarparput. Nukara siunniikami uangalu aqullunga, apornerani siumut tingerujussuaratta sisoraatillu tassa nutaarsuaq aquutsilik aseruilluni. Assut aliasuppugut kingornali illaatsigalugu nukara qulaallugu ”superman”-itut tingivataarama, tassami sukkatseruttortugut sekund-ip iluani aporujussuarluta uneriasaaratta. Taamaattumik kingumut eqqarsaatigalugu, suna tamarmi nuannersuinnaanngiinnera aamma aserortoqartarnera eqqaammasama ilagaat, taamaakkaluartoq juulli meeqqat ilaquttat tamarmik pitsaasumik ulloq atorluarnissaat kissaatiginartuaannarpoq.

Ullumikkut juulli qanoq atortarpiuk?

Juulli angajoqqaakka, qatanngutikka, soralussakka aamma aappara ilaalu ilagalugit angajoqqaanni juulliaqqami nereqatigiinnersuaq ingerlannissaa ileqqorivarput. Qeerlutooq, flæskesteg aammalu ilaatigut aqissit/ukallit nerilluataartapagut.
Nerereernerup kingorna orpiliarlutalu poortukkanik agguaattarpugut, sulili ullaakkut poortugaq ataaseq ammartarparput sinneri unnukkut orpiliareernermi ammarneqartarlutik. Juullerujussuarmi ulloq eqqissiivilluta ulapputeqarata atortarparput, juullillu aappaaani ilaqutariilluta julefrokosteqatigiinneq ullup qeqqasioqatigiilluta nuannersorsuarmik nereqatigiinneq ileqqoraarput.

Inoqatinnut siunnersuutitsialaat pingasut suut tunniukkusuppigit?

• Pinngortitarsuarput pisinnaatsilluta atorluartarnissaa, soorlu pinialunnikkut snescooterernikkut, imal. pisuttuarnikkut atorluartigi.
• Ullut nuannersumik atorniartarnissaat, pereersut ajornartorsiutit imaluunniit nuanninngitsumik misigisaqarsimanermi ulluinnarni initunnginnissaat pingaartissallugu ullormi nutaajummat.
• Piffik ataaseq uninngavigivallaarnagu ingerlaqqigit, inuunermimi nuannersoqartuaannarpoq, nuanniilliutit uniffigeqinagu.