”Soorunami iluarismaarlugulu nuannaarutigivara! Nunattalu timmisartortitsileqatigiiffia Air Greenland, Kangerlussuarmilu takornarialerisut Albatros, taamatut suleqatigiinnerminnik 2026-mi ingerlatitseqqinniarnerat pillugu Qeqqani innuttaasut sinnerlugit qutsavigerusuppakka”.
Ukioq mannalu silaannakkut angallannermi unammillernartut annertuut eqqarsaatigalugit, 2026-mi Kangerlussuarmut timmisartuussisarnissaq Ilulissanut Sisimiunullu toqqaannartumik atassusilerneqarnera borgmesterip iluarisimaarpaa.
”Ukioq manna tamatta misigivarput nunatta iluani angalanerup akitsorujussuarnera. Tamannalu pissutigalugu ilaqutariit meerartallit nunatta iluani nunarpullu qimallugu angalasinnaanerat amerlasuunut ajornarsilluinnarsimassasoq naatsorsuutigaara. Taamaattumik aappaagumut akit qanoq isikkoqarnissaat ilisimanngikkaluarlugu, iluarisimaarpara nunatta avataaniit angalaniartut ulloq taanna Sisimiunut Ilulissanullu ingerlaqqissinnaalernissaat isumaqatigiissutigineqarsimammat. Taamaasillutik angalasut nunatsinni najugallit angalanermi saniatigut unnuinernut mittarfinnullu akitsuutit qaavatigut immikkut aningaasartuuteqaqqaartariaqannginnissaat pineqartunut annertuumik oqilisaataassaaq”.
Borgmesterilli siunissamut ungasinnerusumut tunngatillugu isumaqatigiissuteqarnissaaq kissaatiginerugaluarpaa.
”Isumaqarpunga ukioq ataasiakkaaginnarlugu isumaqatigiissuteqartarneq siunissamut aningaasaliinissamut pilerinarsaataananilu qulakkeerinninnerunngitsoq. Taamaattumik kissaatiginarpoq nunatta avannaa eqqarsaatigalugu Kangerlussuaq Ilulissallu ataqatigiissillugit siunissamut ungasinnerusumut isumaqatigiissusiortoqarsinnaappat. Taamaattoqarsinnaagaluarpammi qularnanngitsumik Kangerlussuarmi ineriartortitsinissamut aningaasaliinissaq toqqissisimanarnerussagaluarpoq.”
Borgmesterillu Kangerlussuarmi Albatrosi immikkut nersualaarpaa. ”Albatrosip Kangerlussuarmik upperinnilluni akisussaaffimmik, arlerinaammillu tigusisimanera pillugu, assorujussuaq nersualaarlugu qutsavigerusuppara! Aasaq mannami Kangerlussuaq takornarissanik ornigarneqarluarneqarneratigut, aammalu umiarsuit takornariartaatit ilaasuinik Kangerlussuarmi paarlaattoqartarneratigut Kangerlussuaq annertuumik uummaaritsinneqarlunilu pisoqarfiuvoq.
Taamaattumik Kangerlussuarmi Albatrosimut imatut oqarusuppunga, qujanaq sapiissuseqarnissigut takutikkassiuk Kangerlussuaq aamma takornariaqarfissatut ilumut periarfissagissaartoq aammalu Kangerlussuup heliportiinnanngortinneqarsinnaaneranik takorluuisimaneq ilumut kukkunerusoq.” Albatros qujanarsuaq!
Borgmesterillu naggataatigut Qeqqani innuttaasut imatut kajumissaarpai, ”Kommunitsinni suliffeqarfiit taamatut namminneq akisussaaffimminnik tigusillutik periarfissiinerat neriuppunga Qeqqani Avannaanilu innuttaasunit tapersersorluarneqarumaartoq. Aatsaammi taamaasiornitsigut Kangerlussuup atorneqartuaannarsinnaanissaa qulakkeersinnaavarput” taamak borgmesteri, Malik Berthelsen, naggasiivoq.
Annertunerusumik paasisaqarusukkuit attavigiuk
Malik Berthelsen
Borgmester
Qeqqata Kommunia
Tlf. Nr.: (+299) 86 73 00
Assiliisoq: Lisa Germany, Arctic Circle Business
