Qeqqata Kommunia Aasivissuit – Nipisanut suliaqarnerminut tunngatillugu Rauma-prisen 2025-mik nersornaaserneqarpoq

Nersornaat Avannarlerni Nunarsuarmi kingornussat pillugit immikkuullarissumik suleqatigiilluarsimasunut akuutitsisunullu tunniunneqartarpoq. Naliliisartut tunngavilersuutaat:

- Nersornaat Qeqqata Kommunianut aamma Nunarsuarmioqatigiit kingornussassaqarfiata Aasivissuit – Nipisat pillugit suleqataasunut tunniunneqarpoq, taakkumi immikkuullarissumik suliniuteqarnermigut pinngortitaq piorsarsimassuserlu imminnut ataqatigiilluinnartunik piujuaannartitsinissamik suliniuteqarput. Akuutitsisumik suleqatigiinneq aqqutigalugu piorsarsimassutsikkut kingornussassanik illersuinissaq paasissutissanillu avitsinissaq ineriartortippaat. Nunarsuarmioqatigiit eqqissiviilliornerisa nalaanni taama suliaqarnerup, Nunarsuarmioqatigiinnut kingornussat pillugit isumaqatigiinneq aqqutigalugu, nunarsuarmi kingornussassanik tikikkuminarsaaneq nunallu killii qaangerlugit isumaqalersitsineq aqqutigalugit qanoq pingaaruteqartigineranik ersersaavoq.

Piffissaq sivisunerusoq eqqarsaatigalugu suliniuteqarneq pitsaasumik ineriartorfiuvoq
Ukiut kingulliit sisamat ingerlaneranni Qeqqata Kommunia aningaasaateqarfiit 15. Juni Fonden, Aage V. Jensens Fonde, Augustinus Fonden aamma Tips og lottomidler kiisalu kommunalbestyrelsi suleqatigalugit annertuumik suliniuteqarpoq. Ilaatigut makkuninnga:

• Nittartakkamik nunap assinganik qimerloorfiusumik nutaamik pilersitsineq,
• Sisimiut aamma Kangerlussuaq katersugaasivinni saqqummersitsinik aaqqissuineq,
• Kingusinnerusukkut saqqummersitassanngorlugit atuakkiorneq,
• Nunatami piffinni assigiinngitsuni misiliummik suliniuteqarnerit
• Kiisalu pinngortitap eriagisaaneranik mianerinninnissamut nalilersuinerit il.il.

Mianerinninnissamut nalilersuinerit siunissami suliaqarnermut atatillugu pitsaasumik toqqammaviliinermut pingaaruteqarput. Tassani sumiiffimmi innuttaasut pinngortitamik piginnittuiusut qitiujuaannarnissaat ukkatarineqarpoq. Immikkoortumik ineriartortitsineq sumiiffinni najugaqavissunik akuutitsilluni, ilisimariikkanik misilittakkanillu atorluaalluni, pisariaqartinneqartunullu tusarnaarluni ingerlanneqassaaq.

Suliniuteqarnermut tunngatillugu pinngortitami misiliutitut periutsit takorluukkallu misilittarneqarput. Misilittagaqalerneq aallaavigalugu suliniuteqarneq avammut sammisunngortinneqariartorpoq, alloriarnerullu tulliani aallartitsinerit suliniutillu sumiiffimmi najugaqartut peqataaffigisinnaasaat ineriartortinneqassapput.

Nersornaat pisussaaffiliisoq
Rauma-pris-imik nersornaaserneqarneq kommunip, inuiaqatigiit aamma suleqatigiit akornanni ataatsimut suleqartigiinnermut tunngatillugu akuersaarnerujussuuvoq.

- Nersornaat tulluusimaarutigeqaarput. Taassuma takutimmagu piffissaq sivisunerusoq eqqarsaatigalugu suliniuteqarnerput nunat tamalaani maluginiarneqartoq, aammalu pinngortitami, piorsarsimassutsimi sumiiffimmilu peqqissaartumik suliniuteqarneq Kalaallit Nunaata killeqarfii qaangerlugit naleqartoq, Nunarsuarmi kingornussassaqarfimmi Aasivissuit - Nipisammi aqutsisoq Paninnguaq Fleischer-Lyberth oqarpoq.

Nersornaat pinngortitamut sumiiffimmilu najugaqartunut ataqqinnittumik Nunarsuarmioqatigiit kingornussassaqarfiata Aasivissuit – Nipisat pillugit suliaqaannarnissamut, piujuartitsinissamut, illersuinissamut aamma paasissutissanik ingerlatitseqqinnissamut ingerlaannarnissamut kaammattuivoq.

Piviusut
Nunarsuarmioqatigiit kingornussassaqarfia Aasivissuit – Nipisat Qeqqata Kommuniani inissisimavoq: Sermersuup Immallu akornanni Inuit Piniartarfii . Aasivissuit – Nipisat pinngortitamik, piorsarsimassutsimik, piniarnermi aamma aalisarnermi ileqqunik ullutsinni suli atorneqartunik piujuartitsivoq. UNESCO-p nunarsuarmioqatigiit kingornussassaqarfiitut allattorsimaffianut 2018-imi ilanngunneqarpoq, piniarnerup, aalisarnerup, nunasisarnerup inuillu nunat immallu issittut avannarliinut naleqqussarsinnaanerinik ukiut 4.200-rut ingerlaneranni oqaluttuassartaqarlunilu.

Nunarsuarmi kingornussassaqarfimmi sulinermi pinngortitap piorsarsimassutsikkullu oqaluttuarisaanerup piujuaannartinnissaa, aammali oqaluttuarisaanerup ingerlateqqinnissaa, sumiiffimmi inerisaanissaq aamma pinngortitap tamassuma inuit ataatsimut kingornussassaqarfiginerata tulluusimaarutiginissaanik nukittorsaanissaq pineqarpoq.