Helga Martha Olsen Lennert, Qeqqata Kommuniani fuldmægtigiusoq ukiuni 40-ni kommunimi atorfeqarsimaneranut Kunngip Nersornaasiuttagaanik 2025-mi tallimanngornermi oktobarip 31-anni tunineqarpoq.
Saqqarmioq ilaquttani nalunngisanilu qaninnerit peqatigalugit Sisimiuni kommunip ataatsimiittarfiani nalliuttorsiorpalaartumi borgmesteri Malik Berthelsenimit tunniunneqarpoq.
Helga siullermik Sisimiut Kommunerisimasaani, kingornalu Qeqqata Kommuniani ukiuni 40-ni sulilluni, maannakkut borgmesterit arfinillit ataanni sulinikuuvoq. Tamanna immikkuullarilluinnarpoq – minnerunngitsumik ullutsinni suut tamarmik allanngoriartornerini immikkuullarilluinnartuni. Ukiut ingerlanerani qullersarisarnikuusaasa paarlakaattut suliarisartagai naammagisimaartarnikuuaat. Sulisut paarlakaattut, illoqarfitsinni politikerit, meeqqat atuarfiiniit, kommuninit, takornarissanit, Folketingimit, nunanit allanit, Kunngikkunnit allarpassuarnillu sullissinikuuvoq.
Patajaatsutut aalajaatsutullu sulisutut nalunngilluarparput. Ukiorpassuarni kommunip suliaqarfippassuini akuusaareernermi amerlasoorpassuit suliamut aalajangersimasumut aperiartortarpaat. Helga tassaavoq kommunip ilisimasaqarfigisaanik ingerlatitseqqiisartoq. Ilumoortuunissaq pingaartitarivaa, toqqissisimanermik tunisisarluni, tatiginartuulluni pikkorissuullunilu, pisut ilaanni aalajangersimasuusinnaavoq qiimasuullunilu. Ulluinnarni illalaarnissamut quujasaarnissamullu ilaajuaannarpoq. Helga naak pensionereqqammeraluarluni ullup affaani sulinini nanginniarmagu qujamasuutigaarput.
Helga ukiuni 40-ni sulisimanermi Nersornaasigaaneranik pilluaqquarput siunissamilu pilluarnissaanik kissaaterujussuarparput.
Kunngeqarfik Danmarkimi nersornaatitut tunniuttagaanni, Kunngip nersornaatitut tunniuttagaa pisoqaanersaavoq. Aalajaatsumik sulisimanermut akissarsissutissanngorlugu, 1792-imi pilersinneqarpoq.