Qeqqata Kommuniani Sisimiuni, Maniitsumi Napasumilu innuttaasumik nersornaasiineq

Ukioq manna ataqqinaassiussaq uunga tunniunneqarpoq; Elisabeth Lynge Hansen, inunngortoq 27. december 1958

Elisabeth Lynge Hansen Maniitsumi ukiorpassuarni peqatigiiffilerinermini assigiinngitsunik suleqatigiiffigisimasai amerlapput.

Elisabethip Neriuffik Maniitsoq 1990-imili suleqataaffigilerpaa, ulloq manna tikillugu pingaaruteqartumik inissisimasuulluni. Tamatuma saniatigullu nuna tamakkerlugu Neriuffiup Kattuffiani siulittaasutut ukiut arlallit inissisimanikuuvoq. Neriuffik Kattuffilerinermi saniatigut aamma Ikioqatigiiffimmi ukiut 17-it suleqataasuuvoq. Inuit innarluutillit pillugit peqatigiiffiani ukiut 14-it suleqataavoq, tamalumalu saniatigut aamma biiliutillit peqatigiiffiani suleqataasuulluni. Aammattaaq Sulisartut Peqatigiiffiani (S.I.P) 2000-imili siulersuisuni suleqataasuuvoq tassanilu ukiut kingulliit 13-nit siulittaasutut inissisimalluni aammattaarlu SIK-p Kattuffiani ukiuni arlalinni siulersuisuni suleqataalluni.

Elisabeth Lynge Hansenip taamaasilluni takutippaa, piumassuseq annertooq pigalugu, eqiasuilluni, nukittulluni, sunniuteqarluarlunilu ukiorpassuit suleqataanermini saniatigut aamma piniarneq, aalisarneq pilinerlu ukiorpassuit nammineq ingerlallugit. Elisabeth imminut pilersorneq ilitsoqqussani attatiinnarpaa. Elisabeth namminerisaminik umiatsiaqarpoq, taamaasilluni ningittakkersorneq, qassusersorneq, tuttunniarneq umimmanniarneq, puisinniarneq, appanniarnerlu ingerlataralugit. Ukiup qanoq ilinera malillugu pilineq aallutaraa, illuaqqanilu atorluarlugu pilineq annertuumik aallutaralugu.

Elisabeth arnaavoq nukittooq, uinilu inuusunnerugallaramik aavartarput, utoqqaliartoraluarluni aasat tamaasa aavarneq allamik ilalerluni ingerlataraa pingaartumik Anngujaartorfimmi umimmanniarneq tuttunniarnerlu aammalu Maniitsup eqqaani aalluttaralugit.
Ukioq manna nersornaasiussaq uunga tunniunneqarpoq; Anthon Davidsen inunngortoq 8. maj 1979 Sisimiuni.

Anthon Davidsen meeraallunili erinarsornermik nuannarisaqarpoq, inersimaleramilu suli erinarsornermik aallutaqartuulluni.

Inersimalereerluni erinarsoqatigiit ukiorpassuarni peqataaffigisartakkamini erinarsoqataajutigaluni sungiusaasutut ikiuuttarpoq saniatigullu aalajaalluni eqiasueqalunilu erinarsoqatigiinnut ingerlatsiuartuulluni.
Ukiut arlallit erinarsoqatigiit “Noqartit” sungiusaaffigereerlugit ukiuni kingullerni pingasuni erinarsortuuvoq. Taassuma saniatigut angutit erinarsoqatigiit “MALIK” sungiusartarpai sungiusaasuata toqukkut qimagutereernerata kingorna.
Anthon ulluinnarni suliffimmi saniatigut soqutigisaminik aallussisuuvoq, tamatumalu saniatigut erinarsoqatigiilerineq pingaartittuullugu.

Taamaasilluni Anthonip ersersippaa erinarsorneq annertuumik soqutigisaralugu, erinarsornerullu silarsuaani peqatigiiffiit aalajangersimasut unittuunnginnissaat annertuumik sulissutigisuullugu. Sungiusaanissaminut piffissaq atorluarlugu sungiusaasarpoq, Sisimiuni erinarsoqatigiinnut pingaaruteqarluartuullunilu.

Ukioq manna ataqqinaassiussaq uunga tunniunneqarpoq; Petrus Jessen, inunngortoq 8. januar 1943.

Petrus Jessen inuusutseruttornerminili angajunilu pujortuleerartaarput, aalisarneq piniarnerlu inuussutissarsiornera taamalili aallartippoq Napasumilu ineriartortitseqataalluni.

Petrus Jessen aamma Piitaannaq-mik taaneqartarpoq. Aalisarneq piniarnerullu silarsuaani piumassuseqarluartuuvoq.
Petrusip inuusuttuaraallunili piniarneq aalisarnerlu aallutarilerpai, angajunilu pujortuleerartaarnermi kingorna 30 fod-simik pitaarput Jessen-imik atsikkaminnik. Petrus 23-nik ukioqarluni Karen D pisaarivaa tassanilu naalaganngorluni. Tamatuma kingorna Napasumi inuusuttoqatini piorsaaqataaffigalugit inuttarisarpai, allaallumi kilisaatinut inuttaasinnaanermut aqqutsissiuussisutut taaneqartarluni. Piffiit ilaanni misilittaasarpoq ningittagarsornermi raajarniarnermut nuukkamik Napasup eqqaani. Tikaagullinniarnerup kingorna Napasoq, Maniitsoq, Atammik allaallumi Nuuk neqinik tunioraavigisarpai, kisissaanngitsunillu saarullinnik pisaqarnikuulluni. Petrus Nunaqarfimmi Aqutsisunut 1971-1975 aammalu kommunalbestyrelsimi ilaasortaanikuuvoq 1975-1979. Petrus inuttut qiimasuuvoq pattagiaasallaqqissuullunilu qititsitsisarsimalluni, taamaasilluni Napasumi Napasullu eqqaata imartaani sunniuteqarluarnikuulluni.