Louisannguaq Rosing, Qeqqata Kommuniani Nunaqarfinnut Ataqatigiissaarisutut atorfilik, ukiuni 40-ni pisortani atorfeqarsimanermini kunngip nersornaasiuttagaanik sølviusumik sapaatiummat nersornaaserneqarpoq.
Kangaamiuni Nunaqarfinni Aqutsisuni Siulittaasoq Barnabas Larsen ilaatigut oqarpoq:
"Nuannaarutigeqaara Ataqqinartorsuup Kunngip Frederiup aamma nuliatalu Ataqqinartorsuup Maryp nersortariaqartunut saqqarmiuliuttagaa søvlviusoq maani sullissilluartumut ukiunilu 40-runi imaannaangitsumik suliaqartuarsimasumut Louiisannguaq Rosingimut tunniussinnaagakku. Nersornaallu tunniunneqartoq pissusissamisoorpoq ilinnut tunniutissallugu.
Ukiut 40-rut Ila inuunermi amerlaqaat, qularinngeqaara suleqatigisarsimasatit allallumi sullittagarisarsimasatit maannali toqukkut qimagussimasut ataatsimut eqqarsaatinniissimassasut. Tamaasa eqqaamallugit Nunaqarfimmioqatigullu sinnerlugit uaguttaaq qujassutigut apuukkusupparput.
Suliarpassuit ingerlattarsimavatit ilaatigut ilungersunartortaqaqisut, aammalu aalajaallutit ingerlatsisarnitit qujanartaqisut tunniusimalluarlutilli qiimallutillu ingerlaffigiuartarpatit neriuppugullu suli ukiorpassuit sullissilluarumaartutit.
Ukiuni kingulliunerusuni Kommunerujussuit pilersinneqarneranni Nunaqarfinni Ataqatigiissaarisutut aamma atuupputit, ningiutut ingerlatsininni saaffikkuminartuunerit takuajuartarparput."
Kunngeqarfimmi nersornaatitut tunniunneqartartoq Kunngip nersornaatitut tunniuttagaa pisoqaanersaavoq. Aalajaatsumik sulisimanermut akissarsissutissanngorlugu, 1792-imi pilersinneqartoq.