Eqqakkanut suliniut: Qinnuteqartoq Maniitsumi Maniitsullu eqqaani eqqakkanik teqqaanikunik, piumassutsiminnik ikiuukkusuttut allat ilagalugit aasaanerani katersuiniarpoq. Qeqqata Kommuniani teknikkeqarfimmiik aaqqatinik puussiarsuarnillu tunineqassamaarpoq, Brugsenimiik Pisiffimmiillu naatitanik, kaffe allanillu tunineqassamaarput, Atuilluartuunissamullu aningaasaliissutigineqartut sandwichinut, grillerutissanut angalanissamullu orsersornissamut aningaasartuutinut atorneqassapput.
Dai Assaqutaq Nuan 2026: Qinnuteqartoq piumassutsiminnik suleqataasut allat peqatigalugit, ukiut 22 aasaanerani meeqqanut Assaquttamukartitsisarpoq. Ukioq manna suliniummut ingerlalluartartumut Qeqqata Kommuniani Atuilluartuunermik aningaasaateqarfimmiik aningaasaliiffigineqaqqippoq. Aasaanerani meeqqat atuanngiffeqannginneranni asimiitsinneqarlutik, umiatsiarlutik aalisartinneqassapput. Meeqqat tamarmik illoqarfitsik qimallugu angalasanngimmata, illoqarfik qimalaarnissaanut periarfissatsialaavoq.
Piniariartarfiit unnuiartortafiit illuaqqat: Umimmanniarnermi illuaqqat akornanni ungasissuseq annertummat, qinnuteqartup Itinnerup tasersuata avannaatungaaniit Isortup kuussuata tungaanut illuaqqamik sananissamut, kissarsuummut, assartuinissamullu qinnuteqarpoq. Illuaraq tamanut atorsinnaasutut siunertaqarpoq, sillimaniarneq eqqarsaatigalugu aammalu umimmanniarneq ajornannginnerunissaanut siunertaqarluni.
Qimminut qitsunnullu ikiueqqaarnissamut akuttaskeq: Qinnuteqartut Maniitsumi uumasut nakorsaqannginnera peqqutigalugu uumasunut akuttaskesinissamut qinnuteqarput. Nunatsinni Nuummi kisimi uumasut nakorsaqarmat, nunatsinnilu isorartussuseq silallu allanngorarsinnaanera peqqutaalluni Nuummut tikipallannissaq ajornakusoorsinnaasarpoq. Akuttaskep iluani qimmit qitsullu toqunartunik pinermi allatulluunnit ajoqusersimanermi ikiorsiissutinik imaqarpoq, taamaasilluni uumasut toqunissaanik pinaveersaatitsisinnaalluni.
Sisimiut eqqaani illuaqqat -immikkoortoq 5: Qinnuteqartoq Atuilluartuunissamut Aningaasaateqarfimmiik aningaasaliiffigitereernikuuvoq, Sisimiullu eqqaani illuaqqamik ammasumik inissitassamik sananikuulluni, Arktisk Ingeniørinngorniat aammalu kandidatinngorniat suleqatigalugit. Maanna sanaqqinnissamut, tamanut atorluarneqarsinnaasumik illuaqqamik ammasumik qinnuteqarpoq. Illuaqqat ammasut nunamiinnerunissaq, silallu allanngoriasaartarnera eqqarsaatigalugu sillimaniarnermut siunertaqarput.
Atuagaq Puiseeraq Sille / Sælen Sille / The seal Sille: Qinnuteqartup atuakkiornissamut, meeqqat atuarfianni atugassamut – kalaallisut, qallunaatut tuluttullu allaqqasumik, aammalu kalallimik eqqumiitsuliortumik qalipagartalimmik saqqumiinissamut aningaasaliiffigitipput. Atuagaq meeqqat atuarfianni atuakkanik pisariaqartitsineranik iluaqutaassaaq, aammalu atuakkap oqariartuutaa: immap eqqiluitsinnissaa qanoq pingaaruteqartigisoq atuilluartuunermik tamarmik siunertaqarluartuupput.
Eqaluit eqqaani qimmeqarfik: Qinnuteqartut Maniitsumi qimmiutillit ataatsimoorfigisinnaasaannik qimmeqarfissamik qinnuteqarput, isatersinnaasoq nuunneqarlunilu pisariaqassappat. Qimmeqarfik qimmiuteqartut ataatsimoorfissaattut aammalu qimmit inuunerilluarnisaannut pinnguarfissaannillu qulakkeerissaaq.
Ocean Club House Issittumi ataatsimoorneq immamillu soqutigisaqaqatigiinneq: Qinnuteqartup takorluugaraa Qeqqata Kommuniani immamik, immamilu uumasut naasullu paasisaqarfiginerussagigut. Tamanna ilisimatusarnikkut ilinniartitsinillullu ataatsimoorfiusumik illumik pilersitsinikkut anguniagaraa. Illoq tamanut ammassoq, inuusuttunik peqataatitsisoq takorluugaraa. Ullumikkut immamik soqutiginninnerulertitsinissaq aamma kalaallit pinngortitamik – minnerunngitsumik immamik pingaartitsinerat ataqqillugu suliniut ingerlanniarpaa.
Linki toorlugu paasisaqarnerugit: Atuilluartuunissamut suliniut