Upalungaarsimanermut mesteri Karl Peter Lerch1992-mi 1. februar qatserisartunngorpoq, ukiunilu 25-ni qatserisartuusimanerani Dronning Margrethe aappaata nersornaasiuttagaanik nersornaaserneqarpoq. Karl Peter Lerch 1991-imi qatserisartunngoqqaarpoq, pappialatigulli allattorsimanani ingerlaqqaarsimalluni.
Upalungaarsimanermut ikiorti Abel Olsen 2003-mi 1. januar Akunnaani qatserisartunngoqqaarpoq. Uninngalaariarluni Sisimiuni qatserisartuunini nangippaa taamaasillunilu maanna ukiuni qulinngortorsiorluni.
Upalungaarsimanermut ikiorti Seth Lyberth qatserisartutut sulinini aallartippaa 1. februar 2007, maannalu ukiuni qulinngortorsiorluni. Seth Lyberth taaneqartut siulliit marluk assigalugit ukiut ingerlanerini annaassiniarnermi ikuallattumilu suliaqarnermi ilinniagaqartarsimavoq.
- Qatserisartuuneq suliffiinnaanngilaq inuusaasiullunili. Kikkut tamarmik illumik ikuallattumik qimaagaangata qimaaffiatigut iserlutik qatseriartortarput, ilaatigut taama oqarpoq Upalungaarsimanermut pisortaq Ole Kreutzmann.
Borgmester Hermann Berthelsen aamma ukiorpassuarni qatserisartuusimasunut qujaniarpoq, puigoqqunngilaali aamma aappaasut ilaqutaasullu qatserisartunut tunuliaqutaasartut angerlarsimaffimmillu ingerlatsisuusartut qatserisartutut suliartoraangata.
Qeqqata Kommuniani Sisimiuni qatserisartut tanngassimaarutigalugu paasissutissiissutigaat qatserisartut 17-it nersornaaserneqarsimalersut. 13-it ukiut qulinngortorsiornerminnut, ataaseq ukiut 20-inngortorsiornerminut pingasullu ukiuni 25-ni qatserisartuusimanerminnut.