Ukioq 2008 tarnip pissusaanik immikkut ilinniagaqartoq Maniitsup kommuniani atorfilik sapaatip akunneri pingasuni ataannartumik kinguaasiutikkut atornerlunneqarsimasunik katsorsaavoq.
Atammimmi atorfilik naapertorlugu, inuusuttut pineqartut 18-ileereeraangata malitseqartitsisoqartarsimanngilaq, inuusuttullu pisimasumik 2000-ip kingorna taamanikkut nassuernikuunngitsut kingunerlutitsisutut taaneqarput taakkusimallutillu ullumikkut pisariaqartitsisut.
Taamanikkut soriarsinnaasimannginnamik tupaqqanertik pissutigalugu, maannakkut ilaanniit eqqartorneqartalernikuusimalluni.
Piffissami ukioq 2012-ip naalernerani aammalu ukioq 2013-ip ingerlannerani Maniitsumi suliassaqarfiit akimorlugit suleqatigiit ukuusut Isumaginnittoqarfik, Ilaqutariinnermi inerisaavik, Peqqinnissaqarfik, Atuarfik, Pitsaaliuinermi siunnersorti, Meeqqeriviit, Kigutileriffik aammalu Atammimmi sulisut peqataaffigisaannik Atammik projekt-imik taallugu suliniutit paasisitsiniaanerit innuttaasunillu ataatsimiititsinerit assigiinngitsut ingerlanneqarput.
Nunaqarfinni atorfillit tapersersorneqarnissaat pillugu ukioq 2015-2016 Qeqqata Kommuniani angalaqatigiittartunik (rejsehold) pilersitsisoqarnerata kingorna, suliniutit assigiinngitsut ingerlanneqarput.
Maniitsumi Ilaqutariinnut Inerisaavimmit, Ilaqutariinnermut Immikkoortortamillu ukiut tamaasa Atammimmukartoqartarpoq, tassanilu oqaloqatigiinnerit, paasisitsiniaanerit, innuttaasunullu oqallitsitsinerit ingerlanneqartarlutik, tamatumalu saniatigut Utoqqarnut Immikkoortortaqarfimmit, Angerlarsimaffimmi ikiortit, Innarluutilinnullu Immikkoortortamit aamma Atammimmut angalasoqartarluni.
Atammimmi innuttaasunut tamanut attuisunik pinartunik pisoqartillugu Atammimmi sullissisut suleqatigalugit pinasuartumik sulisunik ilaqutariinnermut immikkoortortamiit suliartortoqartarpoq. Nunaqarfinni sulisut, Maniitsumi immikkoortortani aqutsisut oqarasuaatikkut sisamanngornerit tamaasa 2015-imiilli ataatsimeeqatigisalernikuuaat.
Atammimmi sulisunik pikkorissaanerit aammalu ilinniartitseqqiinerit ingerlanneqarput.
Imigassamik ikiaroornartumillu atornerluinermut katsorsartinnissamik qinnuteqaatit tamarmik ulloq manna tikillugu akuerineqartarput.
Februarip 24-ani nunaqarfimmi akimortumik suleqatigiissitaq ataatsimiippoq, ataatsimiititaliallu aalajangerpaa, marsip arfineq-aappaani innuttaasunut ataatsimiisitsisoqassasoq. Suliniutit suut aallartinneqarnissaannik innuttaasut kissaataat tusarneqarnissaat ataatsimiisitsinissami ataatsimiititaliap siunertaraa, suliniutinullu aallartitassanut kommunalbestyrelsimi ilaasortat aningaasaliinissaminnik kissaateqarlutik.
Siunissami qaninnerusumi Maniitsumi atuarfimmit tikittoqassaaq.
Matumani Atammimmi atuarfimmi atorfillit, atuartut angajoqqaallu suleqatigiissinnaanissaat sammineqassaaq. Ileqqut pitsaasut arfineq-marluk, nipimik aqutsisinnaanissaq, atuarfiup maleruagassai, angajoqqaallu akisussaaffii sammineqassapput.
Suut aallartinneqarsinnaanersut pillugit Maniitsumi Ilaqutariinnut Inerisaavik, pinaveersaartitsinermi siunnersorti, meeqqanut inuusuttunullu immikkoortortaqarfik piareersarlutik aallartereerput.
Qeqqata Kommuniata aamma Namminersorlutik Oqartussat akornanni suleqatigiinnissaq aallartikkumallugu, nunalu tamakkerlugu neqeroorutigineqartutut kinguaassiutitigut atornerlunneqarsimasut kingunerlutsitsinerinik ikiorserneqarnissaat anguniarlugu, Atammimmut angalasoqarnissaa siunertaralugu, Qeqqata Kommuniani qullersaqarfik Namminersorlutik Oqartussanik ataatsimeeqateqarnissaminik kissaateqarluni saaffiginnissuteqareerpoq.