Inuummarissaasutut ilinniarneq CSR Greenlandimit, Peqqissutsimut Naalakkersuisoqarfik kiisalu Kalaallit Nunaanni Timersoqatigiit Kattuffiat suleqatigalugit aaqqissuunneqarpoq, 2017-imi ilinniarneq Nuummi ingerlanneqaqqaartussaammat, 2018-imi avannaatungaani ingerlanneqarnissaanik pilersaarutaasimagaluarpoq.
Peqqinneq Kommunalbestyrelsimut nutaamut kiisalu suleqatigiinnissamut isumaqatigiissummi pingaartinneqarmat, ilinniartitsissutip 2017-imut siuartillugu ingerlanneqarnissaa Qeqqata Kommunianit kissaatigineqarsimavoq. Taamaattumik Qeqqata Kommunia 19-inik peqataateqarsinnaanerminik nuannaaruteqarpoq, peqataasut Utoqqaat Angerlarsimaffianit, atuarfinnit, meeqqerivinnit allaffeqarfimmiillu aggerfeqarput, peqataasullu taamaalillutik suliffeqarfimminnut peqqinnissaq pillugu paasisimalikkaminnik nutaanik tunniuissaqarsinnaalissapput aammalu suleqatiminnut ilaquttaminnullu peqqinnissakkut suliniuteqarsinnaalerlutik.
- Innuttaasut peqqissuunissaannut uagut kommunimi aamma akisussaaqataavugut, innuttaasummi peqqissoorusuttut ilisimavarput, piffissalli ilaanni tapersersorneqarnissaminnik siunnersorneqarnissaminnillu pisariaqartitsisarput, inuummarissaasunngortussanut Qeqqata Kommuniani borgmesteri Malik Berthelsen oqalugiaammini taamak oqarpoq.
Tamannalu tunngavigalugu kommunimi sulisut ilisimalikkaminnik suleqatiminnut innuttaasunullu atorluaanissaannik siunnersuivoq.
- Tunissummi annerpaaq uagutsinnut tunniunneqartoq tassaavoq peqqinnissarput. Ajoraluartumik atuartuutigut peqqinngitsumik inuuneqaleriartornerat takusinnaavarput, taamaattumillu inuummarissaasunik ilinniartitsinermik suliniuteqartoqarnera nuannaarutigaara, taamak nangilluni oqarpoq.
Tamaginnut
Sulisut ilaat ilisimalikkaminnik angerlaassisussaq tassaavoq, Rakel Fisker Heilmann Maniitsumi Utoqqaat Angerlarsimaffiat Neriusaameersoq. Suliffeqarfinni ingerlanneqarsimasunik iluatsilluartut pillugit saqqummiinermut kajumilluarluni malinnaavoq.
Peqqinneq timigissarnerlu pingaartitarai, tamannalu tunngavigalugu inuummarissaasutut ilinniarnissaanut suliffimminit innersuunneqarsimalluni.
- Suliffitsinni peqqinnissaq pingaartitatta annersarereermagu, neqeroorut tigulluarpara. Ullaat tamaasa utoqqaat najugaqartut peqatigalugit timigissartarfitsinni timigissarneq ingerlattarparput. Timigissartarfitsinnilu arlalinnik tasisuasuuteqarpugut atorluarnerusinnaasatsinnik, taakkulu qanoq atorneqarsinnaaneranik pikkorissarnermik sakkussannik isumassarsianillu pissarsilluarpunga. Cd qitinnermut atugassaq aamma atulernissaanut qilanaarpunga, Rakel oqarpoq, cd-lu minutsit 15-it missaa qaangiuttoq inuummarissaasunngorniaqatinilu qitillutik atorsimasartik innersuussutigalugu.
- Suliffeqarfimmi timigissarneq taamaallaat iluanaarfissaqarpoq. Inuummarinnerulernarpoq qiimanarnerulernarlunilu, taamaalillungalu aamma najugaqartunut allaanerulaamik qanilaarnermik misigisaqarnarnerulluni, Rakel erseqqissaavoq.
Neriusaami sulisut, utoqqaat peqatigalugit (innarluutillillu Utoqqaat Angerlarsimaffiani najugaqartut) ullaakkut taamaallaat timigissarneq ajorput. Halvmarathon-imilli aamma ingerlatsisarput, aasaq manna aamma siullermeertumik Neriusaaq Games ingerlanneqarpoq – rollatorit atorlugit arpaliunneq ingerlanneqarluni. Pinnatassaqarpoq allallu, ukiullu tamaasa tamanna ingerlanneqartarnissaa sulisunit anguniarneqarpoq.
- Suliffimmi timigissartarnissaq innersuunnartupilussuuvoq. Suliffeqarfiit tamarmik tamanna ingerlattalernissaat neriuutigaara, Rakel oqarpoq.
Sakkut atorluarsinnaasut
Pikkorissarneq Taseralimmi ingerlanneqartoq, Qeqqata Kommuniani tamanit peqataaffigineqarpoq. Pikkorissaanermut ulluni marlunni sivisussuseqartumut, Sisimiuni, Maniitsumi nunaqarfinniillu meeqqerivinnit, atuarfinnit kommunimiillu sulisunit peqataasoqarpoq. Peqqinnartunik ullup qeqqasioreernerup kingorna pisuttuartoqarpoq.
Qeqqata Kommuniani timersornermut siunnersorti Qillaq Banemann, inuummarissaasutut ilinniarnissamut periarfissinneqarnini nuannaarutigaa, pikkorissaanerlu Qillamut naapertuulluinnarpoq.
- Ulluinnarnimi peqqinnissaq timigissarnerlu pillugit sulivunga, taamaattumillu pikkorissarneq una uannut naapertuulluinnartuulluni. Qanoq ililluni sulisunik qiimanerusunik pissarsinissaq kiisalu napparsimasarnerit qanoq annikillisinneqarsinnaaneranut sakkussanik pitsaasunik pissarsiffiuvoq, taamak oqarpoq Nalunnguarfiullu isuaniittunut ilannguteqqilluni, tassani sungiusarnissamut imaluunniit pinnguarnertut taaneqarsinnaasumut, timigissarnermik, nuannisarnermik illarnermillu imaqartumik, qanoq iliortoqarnissaanik ilitsersorneqarlutik.
Soorlu borgmesteri Malik Berthelsen oqalugiaammini oqartoq:
- Inuuneruna kanooneq!