Morten Fly Pallesen suliniummut nutaamut isumassarsisuuvoq, siunertarineqarlunilu atuartut tamarmik atuarnerup nalaani sammisassanik allanartunik suliaqartinneqartarnissaat.
Morten-ip suliniutaa Danmark-imi aallartippoq, tassani malitassaalluni atuartut ullut tamaasa minutsini 45-ni aalasarnissaat.
- Taamaattoq Danmark-imi ilinniartitsisuuninni misilittagaara minutsit 45-t sivisuallaartut, Morten oqarpoq, Qinnguata Atuarfiani ilinniartitsisuusoq.
22 minutseqqissaat toqqarneqarput, taakku minutsit amerlassusaat asuliinnaq pinngillat.
- Atuarnermi ataatsimi assersuutigalugu atuartitsinerit arfinillit eqqarsaatigissagaanni, ullut tamaasa minutsit 45-t atuartitsinerit arfinilerarterutigivai. Taamaammat aalajangerparput minutsit 30-t piviusorsiorpalaarnerusut, aamma kulturi nutaaq ineriartortitassasut eqqarsaatigalugu, Morten nassuiaavoq kisitsininilu nangillugu:
- Taamaattumik anguniagaasimavoq atuartut agguaqatigiisillugu ullut tamaasa minutsini 30-ni aalasassasut. Sapaatip akunneranut atuarfiusumut nuukkaanni 150 minutsini aalaffiusussanngussaaq. Eqaarsaarnermi aalasarneq pigeriigarput sapaatip akunneranut ataatsimut minutsit 40-pput, taakkua minutsit 40-t ilanngaatigigaanni minutsit 110-mut apparput. Minutsit 110-t ullunut tallimanut agguataaraanni ullormut minutsinut 22-nngussapput, oqaluttuarpoq.
Suliamut atatillugu aalaneq
Aalanissaq eqqarsaatigigaanni imaanngilaq isikkammik arsaalluni assigisaanilluunniit.
- Atuagarsorluni suliamut tunngasunik sammisaqaatigaluni aalanissaq pineruarput, soorlu assersuutigalugu matematikkimi agguaanermi sungiusarneq, naturfagini oqariartaatsit imaluunniit tuluttut oqaatsit naanilersorneri.
Taamaaliornikkut timi atuartitsinerup nalaani uninngaannartussaagaluartoq aalatinneqartassaaq, Morten nassuiaavoq.
Maannakkut Qinnguata Atuarfiata sammisassaq nutaaq ingerlatileruttorpaa, taannalu juullip tungaanut ingerlanneqassalluni. Ukiumi atuarfiusumi katillugit sammisassat assigiinngitsut sisamat ingerlanneqassapput.
- Suliniuterput suli nutaajusorujussuuvoq, kisianni tamarmik ajunngitsumik tiguaat aalanerunissarlu imminermini meeqqanut peqqinnartuulluni, Morten oqarpoq.
Qinnguata Atuarfiata ingerlaaseq ukioq manna aallartinneqartoq nalilersuiffigisussanngoqqavaa.