Sofie Boassen Sisimiuni inuununngorpoq, aammalu 1958-imi Edvard Boassen katinnikuullugu. Ukiut 30-t katissimareerluni Sofie uillarninngorpoq. Sofie arfinilinnik qitornaqarpoq, 16-inillu erngutaqarluni, arfinilinnillu ernutaqqiuteqarluni. Naak uini annaajaarnikuugaluarlugu, qitornani ilaquttanilu sutigut tamatigut tapersersorsinnaasimavai.
Sofie ukiut 45 missaani aalajaalluni tatigineqarlunilu Kigutileriffimmi sulisimavoq aammalu suleqatimi sullitamilu akornanni nuannarisaasimalluni. Sofie Sisimiuni peqatigiiffilerinermi peqataanikuuvoq, aammalu SSP siulittaasuuffiginikuullugu, peqatigiiffiullu pitsaasumik aningaasaqarnissaanut qulakkeerinneqataasimalluni.
Sofie taamatuttaaq Arnat Peqatigiinni peqataanikuuvoq, peqatigiiffimmullu piffissap ilaani siulittaasuunikuulluni. Arnat Peqatigiinni ilaasortaanermini peqatigiiffiup nammineq illuuteqalernissaa sorsuutiginikuuvaa, anguneqarnissaanullu peqataanikuulluni.
Sofie soraarninngorami Utoqqaat Nipaannut ilaasarsimavoq aammalu Utoqqaat Peqatigiiffiannut ilaasortaasimavoq, siulittaasuuffigisimasaminik.
Bormgmester Malik Berthelsen Sofie Boassen-imut oqalugiarnermini, kommunimi innuttaasorpassuarnut annertuumik sunniuteqartumik, kusanartumik suliniuteqarsimanera qujassutigalugu oqaatigaa aammalu erseqqissaatigalugu, Sofie arnaasoq maligassiuisoq, peqatigiiffinni sulinermigut amerlasuunut isumassarsititsinikuullunilu kajumissaasuunikuusoq.
Qeqqata Kommuniata tupinnaannartumik maligassiuisimaneq ersarissarusuppaa, taamaalilluni allanut isumassarsiorfiusinnaammat. Nersornaasiisarneq diplomimik aammalu aningaasanik tunissutitalik Qeqqata Kommuniani ukiut tamaasa tunniunneqartarpoq. Nersornaat inunnut, nersortariaqartumik immikkut suliniuteqarnermikkut, kommunip iluani soqutiginninnermik, eqiasuissutsimik suliniuteqarnermillu takutitsisunut tunniunneqartarpoq.