airplanebooksbriefcase business cogs cross election entertainment fish house law lockmedicalpeopleselfservices socialtax

Atuartut angerlarsimaffianni meeraq qitiutillugu

Atuartut angerlarsimaffianni najugaqartunut atugassarititaasut, atuartullu atuarnerat pitsanngorsarniarlugit Qeqqata Kommunia arlalinnik suliniuteqarpoq. Atuartut Maniitsumi Atuarfik Kilaaseeqqami 9. aamma 10. klassimi atuarniarlutik atuartut angerlarsimaffianut tikikkaangata, atuartut ataasiakkaat qitiutinneqarnissaat suliniutit taakku siunertaraat.
16. januar 2018

Itillimit, Sarfannguanit, Napasumit, Atammimmiillu inuusuttut arfineq-pingasut najugaqartuutigalugit, Qeqqata Kommuniani Maniitsumi atuartut angerlarsimaffiat ”Minikollegia” ullumikkut Qeqqata Kommuniani borgmesterimit Malik Berthelsen-imit kiisalu Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisumit Doris J. Jensen-imit pulaarneqarput.



Atuartut angerlarsimaffianni najugaqartunut atugassarititaasut, atuartullu atuarnerat pitsanngorsarniarlugit Qeqqata Kommunia arlalinnik suliniuteqarpoq. Atuartut Maniitsumi Atuarfik Kilaaseeqqami 9. aamma 10. klassimi atuarniarlutik atuartut angerlarsimaffianut tikikkaangata, atuartut ataasiakkaat qitiutinneqarnissaat suliniutit taakku siunertaraat.

Ukiualuit qaangiummata atuartut angerlarsimaffiani najugaqartut 20-t sinneqarput, atuarunnaartartorpassuillu ajornartorsiutigineqarsimallutik. Atugassarititaasut pitsanngorsarniarlugit, atuarunnaartartullu ikilisarneqarnissaat qulakkeerniarlugu, ukiuni kingullerni atuartut angerlarsimaffiat atuilluartuunissamik suliniuterpaalunnik ingerlatsivoq. Atuartut angerlarsimaffiani inuuneq pillugu angajoqqaat ilisimasaqalersikkumallugit, atuarfik alakkartertinniarlugu, ilinniartitsisunillu naapitaqartinniarlugit angajoqqaat tamarmik sapaatip akunnerata naanerani Maniitsuliartinneqartarnerat ilaatigut taaneqarsinnaavoq. Nunaqarfinni akullerni angajullernilu atuartut, atuartut angerlarsimaffiannut nuutsinnagit atuarfimmi atuaqatissatik atuartut aamma tikillugit malinnaavigiartortarpaat. Tamatuma saniatigut atuartut angerlarsimaffiani suleriaaseq, nunaqarfinni atuarfinnik, illoqarfimmilu atuarfimmik suleqateqartarnerit allanngortinneqarput, soorluttaaq Ilaqutariinnermut Immikkoortortamik Inerisaavimmillu suleqateqartarnerit nukittorsarneqarlutik.

Ukioq atuarfiusumi matumani atuartut angerlarsimaffianit angerlaannartoqarnikuunngilaq.
Borgmester Malik Berthelsen pulaareernermi kingorna oqarpoq: ”Atuartut angerlarsimaffiani inuusuttut akisussaaqataanissaannik sulisut suliniuteqarmata nuannaarutigaara. Assersuutigalugu najugaqartut eqqiaasinnaanerat, nerisassiorsinnaanerat, angerlarsimaffimmi torersaasinnaanerat sulissutigineqarpoq, atuarnerullu ullut tamaasa malinnaaffigilluartarnissaa eqqaasitsissutigineqartarluni. Sulisut inuusuttunut maligassiuisuunerminnik ilisimaarinnilluartut ersarilluinnarpoq.”

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq Doris J. Jensen oqarpoq: ”Atuartut, atuartut angerlarsimaffiallu ingerlalluartut takullugit assut nuannerpoq. Ilinniartitaanerup iluani assersuutitsialaat takusakka Naalakkersuisutut nuannaarutigaakka, ilinniartitaanerullu iluani ineriartortitsilluta sulinissatsinni suut isumassarsiorfigisinnaanerlugit takusinnaavara. Atuartut angerlarsimaffiat siunissami ajunnginnerpaamik kissaappara, Maniitsumilu tikeraarnitsinni tikilluaqqusaalluarnerput nuannaarutigaara.”

Atuartut angerlarsimaffiat pillugu paasissutissanik annertunerusunik pissarsiniaraanni, atuartut angerlarsimaffianni aqutsisoq Eva Jessen, oqarasuaat 54 77 93-imut attavigineqarsinnaavoq.