Kinguaassiutitigut kanngutsaatsuliortarnerit akiorniarlugit, Nakuusa nuna tamakkerlugu paasititsiniaanermik "Ullut Tamaasa" tunngavigalugu innuttaasunik ataatsimiisitsivoq.
Borgmesteri Malik Berthelsen tikilluaqqusilluni ima aallarniivoq, ”Kinguaassiutitigut kanngutsaatsuliortarnerit Qeqqata Kommunianit unitsinniarpagut, uagut inersimasutut suliassarput annerpaaq tassaavoq, meeqqanik illersuinissaq”. Kanngutsaatsuliornerit pillugit ilaqutariit akornanni isertuussisoqartarnera Borgmesterimit alianartutut isigineqarpoq.
- Inersimasoq meeqqamik illersuinngippat, taava meeraq meeqqatulli allatut pitsaasumik inuuneqarnissaanut kina illersuisuussava? - meeraq unnuakkut sinissinnaaqqullugu, kina illersuisuussava? Nipangersimaannarnikkut meeqqap atornerlunneqaqqinnginnissaa qanoq isilluta qulakkiissavarput?
Atornerluisoqannginnissaa qulakkeerniarlugu kiisalu pinaveersaartitsiniarluni, kommuni qaammatini kingullerni suliat akimorlugit sulianik ingerlataqarpoq.
Innuttaasunik ataatsimiisitsinermi Politikommisær Karl Jørgen Lennert aamma peqataavoq, unnerluussummillu tigusaqarsimatillutik, qanoq politiit suleriaaseqartarnerinik oqaluttuarpoq.
Ajornartorsiutit qaangernissaannut ataatsimooqatigiinnissatsinnik Karl Jørgen Lennert kaammattuivoq, ”kinguaassiutitsigut kanngutsaatsuliortarnerit meeqqanik annertuumik eqquisartut pillugit suleqatigiissaagut”.
Kanngutsaatsuliortarnerit ataasiakkaanut qanoq kinguneqarsinnaasarneri kiisalu inuup inuunerani kinguperlutsitsisarnerit avatangiisinut qanoq sunniuteqartarneri pillugit, miljøarbejder Angerlate Enoksen saqqummiivoq.
Innuttaasut 40-t peqataapput, kanngutsaatsuliortarnerillu qanoq pinaveersaartissinnaanerinut suleqatigiissitani suleqataallutik. Isumassarsiat ilaat saqqummiunneqartut tassaapput; meeqqanik ingerlanerluttunik pisiniarfinni sulisut arlaleriarlutik isiginnittuusarmata peqataatinneqassasut, taxaatilinnik peqataatitsineq, taakkulu qanoq pitsaanerpaamik ikiuisinnaanerinik pikkorissartinneqarnissaannik neqeroorfigineqarsinnaapput. Meeqqat toqqissisimananngitsumik atugaqartinneqarnerini, assersuutigalugu affarlit fiistappata imerlutillu, namminerlu nalunagu meerartaqartut, taava innuttaasut pasitsaassaminnik unnerluussisussaatitaasut erseqqissaatigineqarpoq. Meeqqat erngertumik ikiorserneqarnissaat anguniarlugu, teknikkikkut ikiuutinik ineriartortitsinissaq siunnersuutigineqarpoq.
Siunnersuutigineqartut tamarmik kommunimit katersorneqarput, suliallu akimorlugit suleqatigiissitanik suliamik ingerlatitseqqissallutik, suliniutillu tamakku 2018-imi februaarip 21-ani kommunalbestyrelsip "Qeqqata Kommuniani meeqqat inuunerissut"-mik sammisaqarnerini saqqummiunneqassallutik.