Imeqarfiup killeqarfia pillugu paasissutissat
Imeq imigassarput illoqarfimmilu aalisakkerivik illersukkit – inatsisitigut unioqqutitsinngitsumik qamuteralaat atorlugit imeqarfiup killeqarfiatigut ingerlagit.
Imeq imigassarput imeqarfimmit pissarsiarisarparput. Innuttaasut peqqissusaannut ingerlalluarnissaannullu, inuussutissarsiuuteqarfinnut, inuussutissanik avammut nioqquteqarnermut taamatullu kommunimut nunallu aningaasaqarneranut imeq minguitsoq pingaaruteqarpoq.
Aalisakkanik avammut nioqquteqarneq nunatta pingaarnertut aningaasaqarnikkut isertitaqarfigaa.
Ikummatissat uulialu kemikalianik imermi arrortinneqarsinnaasunik akoqarput, taakkulu inunnut ulorianaateqarlutik.
Imermi ikkattumi angallanneq erngup naqqanik neriuisarpoq, piffissami sivisuumi mingunnik mikisuararsuarnik oqittunnguanillu kiisalu naasunik toqunikunik imermi teqqalaalersitsisarluni. Mingunni mikisuararsuarni bakteeriaqakkajuppoq, taakkulu UV qinngornernit maluginngitsoorneqarsinnaallutik. Taamaattoqartillugu imeqarfimmi UV-filterinit bakteerissat sunniuteqarluartumik toqorarneqarsinnaanngillat.
Imeq imigassarput illersorniarlugu KIISALU imeqarfiup killeqarfiatigut inatsisitigut unioqqutitsinngitsumik ingerlaarsinnaaqqulluta, Sisimiuni imeqarfiup killeqarfianut immikkut ittumik Pinngortitamut, Avatangiisinut Inatsisinillu Atuutsitsinermut Naalakkersuisoqarfik nalunaarusiornikuuvoq.
Nalunaarutip pisinnaatitaaffiliineri ataani atuarsinnaavatit:
Kommuni susinnaatitaava?
´Alanngorsuup` eqqaani Qeqqata Kommunia ujakkaarnermut illiniliorsinnaavoq sisorartarfimmillu ingerlatsisinnaalluni. Qamuteralannik qamussuarnillu ingerlasoqarsinnaavoq. Sikukkut nakkarnissaq annikinnerpaaffianiitinniarlugu, kuuit sanimuinnaq ikaarneqartassapput.
Qamuteralaat qamussuillu kisimik angallassutigineqaqqusaapput.
Qamuteralannik ingerlatillunga susinnaatitaavunga?
Imeqarfiup killeqarfiatigut qamuteralannik ingerlasoqassatillugu, nunap assingani ingerlavissaq tungujortumik nalunaarsorneqarsimasoq malillugu ingerlasoqartassaaq.
Nunap assingani sungiusartarfik kipparissuaqqanik nalunaarsorneqarsimasumi aamma ingerlasinnaatitaavutit. Imeqarfiup killeqarfiani ingerlavissatut sungiusartarfittullu nalunaarsorneqartumi taamaallaat ingerlasinnaatitaavutit.
Sikukkut nakkarnissaq annikinnerpaaffianiitinniarlugu, kuuit sanimuinnaq ikaarneqartassapput.
Ingerlavissiatut sungiusartarfittullu nalunaarsorneqarsimasut avataatigut ingerlasinnaatitaanngilatit.
Siku qajannarunnaarpat kiisalu ingerlaartilluni nunamik naasunillu aserorterisinnaajunnaarluni apisimatillugu, ingerlavissiaq sungiusartarfillu erfalasuaqqanik nalunaarsorneqassaaq. Ukiumi sisorarfiusinnaasup naalernerani erfalasuaqqat piiarneqassapput. Nalunaarsuutit ikkussorsimatillugit taamaallaat ingerlasinnaatitaavutit.
Nunap assingani ingerlavissiaq sungiusartarfillu takukkit.
ATV-nik/sisamanik assakaasulinnik/motorcykelinik/assingusunilluunniit ingerlatillunga susinnaatitaavunga?
Imeqarfiup killeqarfiani ATV-nik/sisamanik assakaasulinnik/motorcykelinik/assingusunilluunniit ingerlasoqaqqusaanngilaq. Imeqarfiup killeqarfiani ingerlavissiatigut allakkulluunniit ingerlasoqaqqusaanngilaq. Imeqarfiup killeqarfiata avataani aqqusinikkut ingerlasinnaatitaavutit. Assersuutigalugu illoqarfimmi aqqusinertaarsuarmilu. Aqquserngit avataatigut ingerlaqqusaanngilatit.
Biilinik ingerlatillunga susinnaatitaavunga?
Imeqarfiup killeqarfiatigut biilinik ingerlasoqaqqusaanngilaq. Imeqarfiup killeqarfiani ingerlavissiatigut allakkulluunniit ingerlasoqaqqusaanngilaq. Imeqarfiup killeqarfiata avataani aqqusinikkut ingerlasinnaatitaavutit. Assersuutigalugu illoqarfimmi aqqusinertaarsuarmilu. Aqquserngit avataatigut ingerlaqqusaanngilatit.
Imeqarfiup killeqarfiani unioqqutitsisumik ingerlasumik takunnikkuma, qanoq iliussaanga?
Imeqarfiup killeqarfiatigut unioqqutitsilluni ingerlasoqartumik takunnikkuit, politiit attavigikkit. Assitalernissaa pitsaanerussaaq. Imeqarfiup killeqarfiatigut angallanneq pillugu maleruagassanik unioqqutitsineq akiliisitaanermik pineqaatissiissutigineqarsinnaavoq.
Innersuussutigineqarput:
Sisimiut eqqaanni imeqarfiup killeqarfilerneqarneranut immikkut ittumik maleruagassat pillugit Namminersorlutik Oqartussat nalunaarutaat normu 9 ulloq apriilip 30-iat 2015-imeersoq. Nalunaarut tamakkiisoq atuarniarlugu una tooruk.
Avatangiisit innarlitsaaliorneqarnissaanik Inatsisartut inatsisaat nr. 9, 22. november 2011-meersoq. Imissaq pillugu kapitali 6.
Inatsittamakkiisoq atuarniarlugu una tooruk.
Illoqarfiup qanittuanut nunap assinga
Imeqarfiup killeqarfianut tamarmuk nunap assinga
