Meeqqat atuarfiannut ataqqinninnerup annertusarnissaanut atuanngitsoortarnerullu annikillisarnissaanut, Qeqqata kommunia Sisimiunilu sulisitsisut peqatigiiffiat (GE) atisaarniarfillu Anuni ukiuni tallimani atuuttussamik isumaqatigiissuteqarput.
Kommunemit suliffeqarfinniillu meeqqqat atuarfianni inortuisarnerup atuanngitsoortarnerullu tamak qaffasitsiginerat ilungersunartutut ernumanartutullu nalilerpaat, taamaattumillu isumaqatigiillutik atuarfimmut tunniusimasuunerup nuannaartunartunngortinnissaa anguniarlugu, atuarfimminnik paarsilluartut nuisalaartinneqarnerulernissaat anguniarlugit immikkut nersorneqartalernissaat.
Ilinniartitaanermut ataatsimiitialiami siulittaasup Evelyn Frederiksenip, sulisitsisut suliffeqarfiit peqataanerat nuannaarutigaa, imalu ilassuteqarluni, "Malinnaaneq sumiuussuseqanngilaq namminerli iliuuseqarfissaalluni aamma taamaappoq atuarnermik paarsilluarneq akisussaaffimmik tigusinerummat".
Sulisitsisuniit aasat tamaasa 7.klasse-ni atuartut pingasut qarasaasianik, Anuni-miillu 8.klasse-nilu atuartut marluk atisanik INUIT Quality Clothes Of Greenland-meersunik akissarsisinneqartalissapput. Suliffeqarfiit namminneerlutik akissarsisinneqartartussat siunnersuutigivaat tassaassasut, atuarfimminnit paarsilluarnerpaat, tassa inortuinatillu atuariartortuaannartut suliakkiutigineqartunullu tunniusimasut aammalu siuariaateqarnerminnik takutitsilluarsimasut.
"Pingaarutilerujussuuvoq atuartuutitta ingerlalluarnissaannut tamatta piumasaqaateqarnissarput, matumani meerartatta siunissami qanoq inuuneqarumaarnerat pineqarput. Nuannaartorujussuussaanga suleqatigiilluta angusat pitsanngortissinnaagutsigit peqquteqanngitsumillu atuanngitsoortarnerit nungutissinnaagutsigit". Borgmester, Malik Berthelsen taamak piumasaqaateqarluni kaammattuivoq.
Atuartut meeqqat atuarfiinit atuarnerminnik naammassinnikkaangamik, suliffeqarfinnut namminersortunut/pisortat suliffeqarfiutaannut ilinniarfissamik assingusumilluunniit pissarsillutik ingerlaqqittarmata, sulisitsisut akissarsititsisalernissamut peqataarusunnerannut patsisaavoq. Piffissaq eqqorlugu takkuttarnissamut kiisalu suliakkiunneqartunik naammaginartumik, pitsaassutikkut piffissatigullu, tunniussinissamut ilaasa ilikkartarsimannginnerat tunngavigalugu kaammattueqataarusuppugut.
- Suliffeqarfinni namminersortuni/pisortat suliffeqarfiini sulilertillutik, piffissaq eqqorlugu kiisalu nammineq avatangiisillu naammaginartitaanik suliakkiunneqartut naammassineqartarnissaasa pingaarutaanik ilikkarsimanissaat pingaaruteqarpoq. Akissarsititsisarnikkut takutikkusupparput, pisinnaasut piumassuseqartullu akissarsitinneqartartut, taamatullu anguniakkat angunissaannut pikkorinnerpaajusariaqanngitsoq. Piffissaq eqqorlugu kiisalu suliakkiunneqartunik suliaqarsinnaagaanni naammappoq. Taamak oqarput Sisimiuni GE-ip siulittaasua Lars Løvendahl aamma ANUNI-miit Kristine Grønvold Samuelsen
Kommunemiit neriuutigineqarpoq aamma Maniitsumi suliffeqarfiit piffissami qanittumi assingusumik isumaqatigiissuteqarfigineqarumaartut.
Assip oqaasertaa: Isumaqatigiissut nutaaq pillugu politikerit inuussutissarsiuuteqartullu nuannaartut. Saamiup tungaaniit Lars Løvendahl, Kristine Grønvold Samuelsen, Evelyn Frederiksen aamma Malik Berthelsen.