Qujanartumik innuttaqarpugut suliffeqarfeqarlunilu akisussaaffeqartunik, ukiut tamaasa namminneerlutik eqqagassanik saligaatsuutitsinissamut suliniuteqartartunik. Tamanna Qeqqata Kommuniata tapersiinnarsinnaavaa kajumissaarutigalugulu. Una nalunaarut ukiuni makkunani annertusarneqartuusoq, ukioq kaajallallugu illoqarfimmi torersuutitsinissami ataavartumik ukkatarinninnissamut tunngassuteqarpoq.
Qeqqata Kommunia nammineq eqqagassalerinermut pilersaarumminik atuutsitsilernissamik suliaqarpoq, aammalu ilaatigut annertuumik ukkataralutigu, illoqarfiit nunaqarfiillu eqqiluitsuunissaat torersuunissaallu, saviminikoqarani aammalu pigisanik unioqqutitsisumik inissiinnagaqarani - nunaminertani tamanit orninneqarsinnaasuni atukkiunneqarsimasunilu.
Nalinginnaasumik kommunip "periuseq mingutsitsisoq akiliissaaq" atortarpaa, taamaalilluni mingutsitsisup aalajangersimasup kingorna saliinermut kommunimi akileraartartunit akilerneqartarani. Mingutsitsisoq ilisimaneqartinnagu, saliinermut akileraartartut akiliisariaqartarput.
Ilaatigut biilinut qamuteralannullu nummerpladeqanngitsunut, angallatinut pigisanullu allanut unioqqutitsilluni inissinneqarsimasunut atortakkatsinnik inuttassarsiuussisarfimmik pisortatigoortumik pilersitsinikuuvugut. Torersaanerup malitsigisaanik kommunip aningaasartuutigisaanut matussutissatut, piginnittut akiliuteqarnermikkut tamakku aasinnaavaat. Pigisat piginnittumit aaneqanngippata, saqqummeereernerup kingorna akisunerpaamik akiliisumut tunineqartarput imaluunniit avatangiisinut inatsimmi aalajangersakkat malillugit isaterneqartarlutik. Suliaq taanna ingerlaannassaaq.
Ukioq manna suliffeqarfiit silataani nunaminertat immikkut ukkatarivagut. Nalinginnaasumik aallaqqaammut inissiinissamut nunaminertamik atugassinneqarsimanissaq atuuppoq, ilutigitillugulu nunaminertap atugassiissutaasup kusanartuutinnissaanut torersuutinnissaanullu nammineq akisussaaffeqarneq. Ilaatigut nunaminertaq isatigassanik soorlu biilinik, maskinanik assigisaanillu nutaanngitsunik angalajunnaarnikunillu, illoqarfimmik kusanaallisaataasunik mingutsitseratarsinnaasunillu peqassanngilaq.
Torersaanissaq pillugu illoqarfimmi sulisitsisut peqatigiiffiannik Qeqqata Kommunia oqaloqatiginninnikuuvoq, taakkulu pilersaarut tigulluarnikuuaat. Suliffeqarfiit ataasiakkat silatiminni nunaminertanik torersaarnissaminnut, 2018-imi januaarimili 2018-imi juunip naalerneranut naammattumik piffissalerneqarnikuupput. Piffissaliussaq malinneqassaaq, suliffeqarfiit namminneq saligaatsuutinngippata, inatsisip periarfissiinera malillugu, annertunerusumik suliakkiinissaq pisariaqassanngitsoq kommunip neriuutigivaa.
Illoqarfik saligaannerusoq takunissaanut assut qilanaarpugut.
Aasarsiorluarisi
Teknikkimut Avatangiisinullu Immikkoortortaqarfik