Inuiaqatigiinni kikkut tamat peqqinnarnerusumik inuuneqalernissaannut ataatsimoortitsinissaq aqqutissiuussinissarlu isumaqatigiissusiornermi siunertaavoq. Peqatigiiffiit aamma meeqqat atuarfiisa/meeqqeriviit akornanni ataqatigiilersitsinissaq siunertaralugu ilinniartitsisunik perorsaasunillu piginnaasatigut ineriartortitsiuarnissat, suleqatigiinnissami ilaatigut aallaaviuvoq. Aqutsisunik sungiusaasunillu piginnaasatigut ineriartortitsineq aamma suleqatigiissutigineqassaaq.
- Sunngiffimminni namminneq kajumissutsiminnik sulilluartorpassuaqarpugut. Timersornermi namminneq kajumissutsiminnik sulisut pikkorissartuarnissaat, amerlanerusullu kajumilersinneqartuarnissaat uagutsinnut pingaaruteqarpoq, taama GIF-imi siulersuisuni ilaasortaq John Thorsen oqarpoq.
Suliffeqarfinni peqqinneq isumaqatigiissummi ilaavoq, kommunillu suliffeqarfippassuini peqqinnerulersitsinissamik kommunimi inuummarissaasut suliaminnit ingerlatsiinnarnissaannut GIF-imik suleqateqarneq aqqutissiuusseqataassaaq.
Amerlanerusut sunngiffimminni sammisaqartarnissaannik, timersoqatigiinnilu ilaasortaanissaannik kissaateqarneq, peqatigiiffiit ilaasortaqarnikkut unamminatik suleqatigiinnissaat anguniarlugu akimortumik suleqatigiinnerisa oqaloqatigiittarnerisalu annertusarneqarneratigut anguneqassaaq.
Timersornikkut suleqatigiinnerup saniatigut imigassanik ikiaroornartumillu atornerluinerit kiisalu peqatigiiffinni kinguaassiutitigut kanngutsaatsuliortarnerit ataatsimoortumik akiorniarneqassasut isumaqatigiissutigineqarpoq.
- Kommunimi timersornerup siuarsarneqarnissaa, amerlanerusullu timersortalernissamik soqutiginnilersinneqarnissaat pillugit suleqatigiinneq nuannareqaara, kisianni pingaartumik imigassanik ikiaroornartumillu atornerluinerit pinaveersaartinneqarnissaannut kiisalu peqatigiiffinni kinguaassiutitigut kanngutsaatsuliortarnerit unitsinneqarnissaannut suleqatigiissinnaanerput nuannaarutigeqaara, taama Borgmesteri Malik Berthelsen oqarpoq.
Timersortarnermi meeqqallu sunngiffiini toqqissisimasumik atugassaqartitsinissamik pilersitsiumalluni, kinguaassiutitigut kanngutsaatsuliortarnerit atornerluisarnerillu pillugit sungiusaasunut/sungiusaasut ikiortaannut paasisitsiniaasoqarnissaanik kommuni pilersaaruteqarpoq.