Kangaamiuneersoq 15-inik ukiulik Julie L. Nielsen sapaatit akunnerini marlunni oqaatsinik ilinniarluni Malta-mut angalanissamut juulimi periarfissinneqarpoq. 9. klassimi atuatuunikuuvoq, maannalu periarfissaqalerami qinnuteqarnissani nalornissutiginngilluarlugu. -Tuluttut oqalunnermut pikkorinnerulerusuppunga nutaanillu misigisaqarlunga, taamaattumik toqqagaagama nuannersorujussuuvoq. Misigisaq pikkunartuuvoq, tassami nuannerluinnaqqissaartumik angaluvugut, ullorlu tamaat tuluttut oqalulluta, Julie oqaluttuarpoq.
Julie L. Nielsen saniatigut Kangerlussuarmeersoq Minik Kreutzmann 15- inik ukioqartoq aamma toqqagaavoq.
-Amerlasoorpassuarnik misigisaqarpunga nutaanillu kammattaarlunga. Angajoqqaarsiani najugaqarpugut, tassaniipput aamma nunanit allanit atuartut. Oqaatsinik ilinniarnerup saniatigut sissaliarnerit sammisallu nuannersut angalanerup nuannerluinnaqqissaartumik misigisanngortippaat, Minik oqarpoq.
Tuluttut oqalunnermi piginnaasat pitsanngortinneqassapput
Qeqqata Kommunia suliniutinut nutaanut aningaasanik immikkoortitsinikuuvoq, taakku atuartut nunarsuarmut angalasinnaanerannut aammalu oqaatsinik ilinniarluni angalanerit paarlaasseqatigiinnerillu aqqutigalugit tuluttut oqaatsiminnik pitsanngorsaanissaannut periarfissiipput.
Taakku saniatigut allamiut oqaasiinik piukkunnaatilimmik ilinniartitsisinnaasunik nassaarnissaq kiisalu ilinniartitsisut oqaatsitigut piginnaasaasa pitsanngorsarneqarnissaannut sulisoqassaaq.
Suliniutit nutaat ukioq manna aallartinneqartut, 8.-9. klassini atuartunut, aasami atuanngiffeqarnerannut tunngassuteqarput. Siunissami qinnuteqartuniit atuartut marluk pingasut ukiut tamaasa toqqarneqartassapput.
Julie aamma Minik tassunga periarfissinneqartuugamik qujaniaqaat. -Uternerma kingorna maluginiarpara, ammanerulersimallunga aammalu siullermut sanilliullugu tuluttut pikkorinnerulersimallunga. Maannakkut uannut oqaatsit ajornannginnerulerput. Kikkut tamaasa oqaatsinik ilinniarniarlutik angalanissaannik kajumissaarumavakka. Imminut akilersinnaavoq! Julie oqarpoq.
Minik aamma taamak isumaqarpoq.
-Periarfissinneqaruit nalunaarit. Puigunaatsumik angalassaatit, naggasiivoq.
Tullissaanik oqaatsinik ilinniarluni angalanissamut atuarfigisami pisortarisamut qinnuteqarnissaq februaarip aallaqqaataani killeqarpoq, atuarfinnilu pisortat qinnuteqaatit ilinniartitaanermut pisortanut ingerlateqqissavaat
Qinnuteqarsinnaanermut tunngavissat paasisutissallu allat atuarfigisami atuarfiup pisortaani, kommunillu nittartagaani pissarsiarineqarsinnaapput.