Inuit inuusunnerusut tallimat Sisimiunut arlaatigut attuumassutillit HIV-mik tunillatsissimallutik, arlallillu tunillatsissimasinnaanerminnut misissugaallutik pillugu nalunaartoqarneq, Qeqqata Kommunianit asuliinnaanngitsutut isigineqarpoq.
Tamanna tunngavigalugu ajornartorsiut annertooq unitsiniarlugu, pinaveersaartitsiniutinut assigiinngitsunut piaarnerpaamik aningaasanik immikkoortitsisoqarpoq.
Ilaatigullu suliffissaaleqisunut inuusuttunullu 15-18-it akornanni ukiulinnut suliffeqanngitsunut ilinnianngitsunullu pikkorissaatitsiartortilluni sammisassaqartitsiartortillunilu, Majoriamiit sexolog-i (atoqatigiinnermut immikkut ilisimasalik) Ulrikka Holm Sisimiunut tikisinneqarpoq. Pikkorissarnerit, sap.ak. marluk missaani sivisussusillit, ilaatigut inuttut ineriartornermut atoqatigiinnermullu tunngasunut tunngassuteqarput.
Taakkua saniatigut Ilaqutariinnermut kiffartuussivimmi pinaveersaartitsisut tv-kkut ussassaarutinik kinguaassiutitigut nappaatinik pinaveersaartitsissutissanik sananissaminnik pilersaaruteqarput, innuttaasunillu ataatsimiisitsinerit napparsimavik kigutileriffillu suleqatigalugit ingerlanneqassallutik, tassani kajumerisartut tiitorfiit HIV-mik akiuiniarluni nalunaarutitallit pilersaarummut aamma ilaallutik.
HIV-ip annertunerusumik tuniluunnissaralua unitsinneqarniassammat, HIV pillugu ajornartorsiutip ukkatarineqangaatsiarneqalernissaa Qeqqata Kommuniata kissaatigaa, innuttaasullu tamarmik imminnut kiisalu inoqatiminnut paarinerulernissaannik kaammattorusuppagut, tamannami akisussaaffik tamatsinniippoq.