Sisimiuni aasamut aalisarnermut teknologimik ingeniørinngorniarluni ilinniarfiup nutaap aallartinnissaanut borgmester Malik Berthelsen qilanaarpoq. Inuussutissarsiornitsinni annerpaasumik aningaasaqarnikkullu isertitaqarfiginerpaasatsinnut sammisumik kiisalu Kalaallit Nunaanni ilinniarfimmik ingerlaqqiffiusumik pitaarpugut.
Ilinniarfiup ineriartortinneqarnerani sulinermut Qeqqata Kommunia peqataanikuuvoq. DTU aalisarnermilu inuussutissarsiuutillit akornanni qanimut suleqatigiinneq takullugu ilinniarfiunikorujussuuvoq. Aalisarnermi inuussutissarsiornermi atuilluartuuneq siunertaralugu ilinniarfik qanoq ineriartortinneqassanersoq, illuatungeriinnit oqallisigikuuaat paasillugulu. DTU aalisarnermilu inuussutissarsiornermi suleqatigiippassuit peqatigalugit suliaq ingerlannikuusaat kusanarluinnarpoq. Ilinniarfissaq nutaaq neriulluarnarpoq.
Sisimiuni ilinniartoqarfik nunarsuamioqataaleraluttuinnarpoq, februaarillu qaammataani DTU-mi ilinniartut 24-t nunani assigiinngitsuneersut borgmesterip tikilluaqquai. 2019-ip affaani siullermi ilinniartut nunarsuarmit tamaneersut, nunat tamalaat akornanni Issittumi Teknkologi ingerlanniarlugu Sisimiuniissaapput. Ilinniartut Amerikap avannaaneersuullutillu kujataaneersuupput, Asiameersuullutik Europameersuullutillu.
Maannakkullu DTU-p ataani aalisarnermut teknologimik ilinniarfittaalerpoq, nunanilu avannarlerni gymnasiamik ilinniarfimmik nutaamik, Island-imi Savalimmiuni Danmarkimilu gymnasiat KTI-mit suleqataaffigineqarlutik aallartitsisoqalerpoq
Sisimiut nunarsuarmioqataanerulermat assut nuannaarutigaara. Inuusuttunut illoqarfiullu siunissaanut tamanna pitsaavoq, Malik Berthelsen oqarpoq nangillunilu, DTU aamma KTI nunat tamalaat akornanni suleqatigiissinnaanermut periarfissat takusinnaammatigit nuannerpoq, tassani ilinniartut ilinniarnermi piffissaata ilaani Kalaallit Nunaanniittassallutik. Ilinniartut nunanit assigiinngitsorpassuarnit aggersuupput, ilinniarnermikkullu nunanit tamalaanit assigiinngitsorpassuarneersut naapittarlugit. Inuusuttunut nunarsuaq ammavoq.
Inuusuttut oqaatsinik ilinniarnissaannik nunarsuarmioqataalernissamullu Qeqqata Kommunalbestyrelsiata ukkataqarneranut tulluartorujussuuvoq. Sisimiuni ilinniartoqarfimmi tamatta tamanna ukkatarisinnaagatsigu nuannerpoq. Maanna neriuutigiinnarpara, ataatsimoorluta pilersitatsinnut nunarsuarmi periarfissarpassuarnut inuusuttut qinnuteqarumaartut. Allanut qinnuteqarit, oqaatsinik ilinniarit, uterlutillu Kalaallit Nunaata ineriartorneranut tunniusseqataallutit, Malik Berthelsen inuusuttunut kajumissaarivoq.