Tassami naatsorsuutiginngilluinnaraluarpara ajutoornissani sioqqutilaarlugu angerlarsimaffitsinnit ingerlammat, eqqumatillugu naggammik oqaloqatigisimassallugu.
Ulloq taanna Laarseeqqamut nulianullu tassaagaluarpoq ulloq nuannaarfiullunilu pilluarfik. Ullormi taanna ilaqutariit qilanaarisarujussuannik erngutaat kuisikkiartorluni Sisimiunut tikinnikuuvoq, Laarseeqqallu kuisitsinissartik pissutigalugu eqqissilluni anersaartorfissaqalaarnissani kissaatigalugu oqaatigivaa.
Laarseeraq inuuvoq tupinnaannartumik siunissamut takorluuisinnaassuseqarlunilu annertuunik eqqarsaatersortartoq, siullermik Maniitsup kommunerisimasaanut kingusinnerusukkullu Sisimiut aamma Qeqqata kommunianut nunatsinnullumi malunnaateqarluni inuusoq.
Laarseeraq inuusuttuunermini ukiuni 8-ini USA-imi Alaskamilu najugaqareerluni Maniitsumut angerlarami inuusuttoqatimi akornanni timersornerup tungaatigut nuannaartorineqarsimavoq aammalu ikinngutini peqatigalugu sisorafiusinnaasumik pitsaasumik ujarlernerminni Apussuit nassaarisimavaat, kingusinnerusukkut sineriatsinniit sisorartartut inuusuttut Apussuarni katersuutsinneqartalernerannik kinguneqartumik.
Nunatsinni kalaallini qaqutigoortuuvoq siunissamut angisoorujussuarnik takorluuisarneq pilersaaruteqartarnerlu. Laarseeqallu sisorarnerup tungaatigut ilisimasaqarluarnini tunngavigalugu, ukiorpassuanngortuni nunarsuarmioqatitsinnit tusaamaneqalersinnaasumik nunatsinnullu takornariaqarnikkut annertuumik iluaqutaasinnaasumik sisorariartarfiliornissaq takorluugarisimavaa. Takorluuinnarnanaguli piviusunngortinniarneqarsinnaanerata upperineqalernissaanut nukippassuit atorsimavai, toqunissanilu sioqqutilaarlugu aningaasaliissinnaasunik suleqatissaminnillu nassaarnertik assorujussuaq nuannaarutigalugu kommunemut unnersiutigivai.
Arctic Circle Race eqqaaneqaraangat Laarseeraq skifte eqqaanngitsoorneqarsinnaanngilaq! Tamannalu qularnanngilaq nunarpassuarni tusaamaneqaatigigaa.
Laarseeqqammi angisuumik eqqarsaateqartarnerata uppernarsarpaa, nunatsinni timersornikkut aaqqissuussat angisuut, nunallu timaani illoqarfimmi atortulersuutit qimallugit aamma torrallatamik aaqqissuussisoqarsinnaasoq.
Arctic Circle Racemi Laarseeqqap ima torrallassimatigivaa, allaat Kalaallit Nunaata Qeqqatalu Kommuniata ilisarnaataasa pingaaruteqarnerit ilagilersimallugu allaat, peqataasartuniillu arlalinnit uteqqiaffigineqalersimalluni, allaammi Rusland-imiit, USA-miit Australiamiillu tusaamaneqalersimalluni.
Laarseeqqallu ACR-ip tungaanut nalaanilu tusaamaneqaatigivaa imminerminut peqqinnanngikkaluartumik, unnuppassuarni sinippiassanani sulerujussuartarnini, takusinnaasarparalu peqataasunit aammalu nunatta avataaneersunit assorujussuaq ataqqineqartartoq, tupinnanngitsumik.
Taamaattumik Laarseeqqamik siusippallaamik annaasaqarnerput kommunemut nunatsinnullu annaasaqataavoq angisooq alianartorlu. Taamaakkaluartoq Laarseeqqap anersaava atorlugu ACR ingerlateqqissavarput.
Laarseeqqap eqqaaneqarnera ataqqinartuuli.
All. Malik Berthelsen, Borgmesteri
