Sisamanngorneq maajip 23-ani MInngortuunnguup Atuarfiani atuartut sapaatip akunnerini tulliuttuni sulerisimanerminnik siulliullutik saqqummiipput, tassani nungusaataanngitsumik ineriartortitsineq pillugu atuartitsissutitut nunarsuaq tamakkerlugu FN-ip nungusaataanngitsumik ineriartortitsinermik ukkataqarnermik ingerlatsisimapput.
Atuarfiup eqaarsaartarfiani atuartut 3 b, 7 b aamma 9 b-meersut angajoqqaaminnut atuarfimmilu atuartunut tamanut FN-ip nunarsuaq tamakkerlugu anguniagaanut sumik suliaqarsimanerminnik saqqummiipput.
Atuartut 3.b-meersut ukkatarisimavaat nunarsuaq tamakkerlugu anguniakkani 12: Akisussaassusilimmik Atuineq aamma Tunisassiorneq, sammisassatullu toqqarsimallugu atisanik atoqqiineq. Atuartut atisanik nammineq allatut mersoqqissimasaminnik, kiisalu kusanartunik atisanik atornikunik takutitsipput, Atuartut mikinerit kusanartumik takutitsinerminnut pattaatitsingaatsiarput. Ingerlanermi ilaatigut atuartut ilinniarpaat atisaliorneq sakkussatigut qanoq pisariaqartiginersoq, avatangiisillu mianerinissaanut atisanik atoqqiineq assut pitsaasuusoq.
9.b-ni atuartut nerisassanik maangaannartitsisarnermik ukkataqarsimapput, ingerlanermilu allagartarsuarnik takussutissanik suliaqarsimapput filmiliorlutillu. Sapaatip akunneri kinguliit ingerlanerini nerisassiorneq nerisassanillu maangaannartitsisarneq pillugu paasisaqarfigisimavaat. Suliffeqarfinnut nerisassiorfiusunut aamma nerisassanik tuniniaaviusunut pulaarsimapput. Angerlarsimaffimminni eqqagassaatitik oqimaalutarsimavaat naatsorsorsimallugulu ulluinnarni klassitut qanoq annertutigisumik eqqaasarsimanerlutik.
7.b-iit ukkatarisimavaat nunarsuaq tamakkerlugu anguniakkani 6. Imeq minguitsoq aammalu Kangerlussuarmut aqqutissaq pillugu aaqqiissutissanik kommunimut siunnersuusiorsimallutik. Klassi imeqarfik avaqqullugu aqqutinut marlunnut 2 QEQQATA KOMMUNIA www.qeqqata.gl Telefon 70 21 00 Telefax 70 21 77 qeqqata@qeqqata.gl Postboks 1014 DK-3911 Sisimiut Grønland
siunnersuusiorsimapput aammalu ATV-nut biilinullu Sarfannguanut ikaartaammik ikaarussisinnaasumik siunnersuusiorsimallutik.
Atuartut ilaata Juliusip oqaatigivaa: " Aqqusinissamut siunnersuutip suliarinera assut pissanganarsimavoq, aammalu ATV-it biilillu sukkut ingerlasarnissaannik ilisimasaqaleqqillunga. Pingaartumik imeqarfimmi imermut milluaasup takunera, qanorlu katitigaanera takullugu nuannerpoq."
7.b-ni ilinniartitsisoq Malte Herlev Nyholt: ingerlaneq pissanganarsimavoq aammali unammillernarsimalluni. Atuartut suliassamut assut soqutiginnissimapput. Aamma ajornartorsiummut kommunip suliaanut ilisimariikkamik, aammalu namminneq aaqqiissutissanik siunnersuuteqarfigisinnaasaminnut suliaqarneq taakkununnga pitsasuuvoq. Atuartut siunnersuutaannik tusarnaarnissamut borgmesterip piffissaqarluni peqataasinnaanera aamma nuannerpoq.
Borgmesteri Malik Berthelsen isumaqarpoq, Kangerlussuarmiit Sisimiunut aqqut, ukiuni arlaqartuni ineriartortitsinissatsinnut killilersuisuusumut aqqiissutissatut atuartut siunnersuutaat tusaallugit pissanganartuusoq.
"Pingaartumik maluginiarpara 7.b-it aaqqiissutissatut siunnersuutaat aqqusinermullu aaqqissutaasinnaasutut takorluugaat, taamatullu erngup minguitsuunissaata isumannaajaarnissaa. Aammattaaq tupaallaatigalugu nuannaarutigilluinnarpara biilit/ATV-it aqqutaani aqqutip sivinganeri eqqarsaatigisimammassuk.
Isumaqarpunga 3.b aamma 9.b-it saqqummiussaat aamma assut ajunngitsuusut aammalu ulluinnarni inuunitsinnut pingaaruteqarnerinik takutitsisut, soorlu atisanik atoqqiineq pisariaqanngitsumillu nerisassanik maangaannartitsisarneq. Atuartut eqqaasippaatigut pissutitsinnik allannguinitsigut pinngortitamik paarinninnerulersinnaanissatsinnik."
Atuartut ingerlasimanerminnik saqqummiussaat pingaaruteqarput, soorlu sapaatip akunnerini kingullerni 3. klassit naammassisimasaat eqqarsaatigalugit. Sapaatip akunnerini tulliuttuni Qinnguata Atuarfiani, Nalunnguarfiup Atuarfiani aammalu Kilaaseeqqap Atuarfiani atuartut malinnaassapput, angajoqqaaminnut atuartunullu ingerlassimasaminnik saqqummiissallutik.
Saqqummiussineq Qeqqata Kommuniani meeqqat atuarfiini piffimmi sivisuumi nungusaataanngitsumik ingerlataq maajimi aallartisarneqartoq alloriarneruvoq siulleq. Siunissami atuarfiit tamarmik immikkut sammisaqassapput, tassani atuartut piujuaannartitsineq pillugu suliaqassallutik. Immikkut sammisaqarnermi atuartut atuartitsissutit akimorlugit suliaqassapput projektinillu suliaqarnermikkut itinerusumik ilisimasaqalerlutik, nunarsuarmi avatangiisiminnik aallaaveqartumik. Taamaalilluni atuartitsineq qanilaarnerunerulissaaq atuartunullu piviusorsiorpalaarnerulerluni.
Ukiumi atuarfiusumi tulliuttumi Qeqqata Komuniani Aktion verdensmål (Nunarsuaq tamakkerlugu anguniakkat) atuartitsisunut atuartunullu tamanut siammartiterneqassaaq. Siunissamittaaq atuarfiit tamarmik ukiukkaartutik immikkut sammisaqartitsisassapput, FN-ip nunarsuaq tamakkerlugu anguniagaanik ukkataqarnikkut.