Tassunga tunngavilersutaasoq tassaavoq, Juliane Henningsen Kommunimit ilisimaneqarluareersoq, Kommunillu ineriartornissaanut suliniutinik/takorluukkanik assigiinngitsunik annertuunik ilisimannereerluni. Siusinnerusukkullu Inatsisartuni Folketing-imilu ilaasortaanikuunerminut atatillugu, politikkikkut suliaqarnermik ilisimasaqarluartuulluni.
Juliane Henningsen qinnuteqarnini tunngavilersorpaa, kommuni pissanganartutut isigalugu aammalu misigisimavoq Kommunimi pisortaanertut atorfik piginnaasaminik tamakkiisumik atuinissaminut periarfissaasoq. Tassani aammattaaq eqqaavaa, ACB-mi pisortaanertut aallartittussangorami - aallartereernermilu kingorna Kommunip anguniagai soorlu ilaatigut pilersaarusiornissamut periusissiaq, suleqatigiinnissamut isumaqatigiissut, aqqusinissamut nalunaarusiaq il.il. malinnaaffiginikuullugit.
”Nuannaarutigivara Julianep pisortaanertut atorfininnissani soqutigimmagu. Juliane takoreerparput ACB-imi pisortaanermini pikkorilluni eqeersimaarlunilu suliaminut pimoorussisuusoq aammalu kommunemi suliagut pingaartitagullu qanimut malinnaavigalugillu suleqataaffigereermagit aammalu meeqqat atuarfiisa suliffeqarfiillu qanimut suleqatigiinnissaanut Qaqisami suleqataareermat isumaqarpunga eqqortoq toqqarsimallutigu. Taamaattumik Julianep suleqatiginissaanut qilanaalungalu isumalluarpunga.” Borgmesteri Malik Berthelsen oqarpoq.
”Nuannaarutigeqaara Qeqqata Kommuniani pisortaanertut atorfinittussanngorama. Atorfilittatut sulininni kommunimut innuttaasunullu pitsaanerpaaq anguniassavara, tamatumanilu qinikkat suliassaqarfinnilu assigiinngitsuni sulisut akornanni suleqatigiinneq pitsaasoq aallaaviussaaq, tamannarpiarlu iluatsinnissatsinnut aqqutissaavoq.
Ukiuni marlunni inuussutissarsiornermut pitsortatut Qeqqata Kommuniani atorfeqarsimavunga, tamatumanilu kommunalbestyrelsip politikkikkut anguniagaat takornariaqarnermut inuussutissarsiornermullu tunngasut ilisimasaqarfigillualersimallugit.
Taamatullu kommunip meeqqat atuarfiata kivinneqarnissaanik anguniagaqarnera immikkut maluginiarpara, minnerunngitsumillu meeqqat inuusuttuaqqallu atugaannik ukkatarinninneq immikkullu suliniutit aallarnisarneqartut suleqataaffiginissai qilanaareqaakka" Juliane Henningsen oqarpoq.
Juliane Henningsen Arctic Circle Business-imit takkutissaaq, 2019-imilu novembarip qiteqqunnerani kommunimi pisortaanertut aallartissinnaassalluni.
Paasissutissat sukumiinerusut
Malik Berthelsen
Borgmesteri
Qeqqata Kommunia