Qaammatit tamaasa innuttaasumik peqqinnarnerusumik inuuneqalernissamut kajungilersitseqataasartumik ilisarititsisassaagut. Qaammammi matumani Benigne Berthelsen-ip apersorneqarnera pillugu atuarsinnaavat.
Suna pissutigalugu timit aalatittarpiuk?
Timi tarnerlu pissarsilluartarmat timiga aalitittarpara. Timersortarpunga inuunerinnissara anguniarlugu. Kræftermik eqqugaanikuullunga timersornikkut nukittunerulertarpunga iluaqutigalugulu. Katsorsartinnerup (kemo) sivisuumik marloriarlugu atoreerlugu, aama naqitsinera
qaffasissorujussuangoraluarami, aalanikkut appariartorluni naliginnaasumik inissisimalernikuuvoq,
iisartakkallu aap naqittineranut apparsaatit atorunnaarlugit.
Timinnik aalatitsinippit nalaani kingornalu qanoq misigisimasarpit?
Timersoraangama iluarisarpara, kiammik aniatitsineq, uummatima tillernera malugalugu tamaviaarnikuulluni naammassillugu takkuttarpoq iluarusunneq, nukittunerulerneq, nuannaarnerulerneq, ulluinnakkut suliassat oqinnerulerlutik.
Sapaatip akunneranut qasseriarlutit timit aalatittarpiuk?
Sapaatip akunneranut pingasut sisamariarlunga timersortarpunga.
Illup iluani silamiluunniit timersortarpit? Toqqakkat tunngavilersoruk sooq taanna toqqarnerlugu.
Nuannarinerusarpara silami timersussallunga. Nunakkut aasaanerani arpak, pisunneq aalluttarpara. Nunarput kusanartorsuaq silaannarissuaq angalaarfigalugu nuannarisuuara. Illuaqqamut pisunneq, sisorarneq, aavarneq. Marloriarlunga Kangerlussuarmiit Eqalugaarniarfimmut pisunnikuuvara.
Ukiukkut sisoraatinik ujakkaartarpunga, ukiormanna sisorarpunga Kangerlussuarmiit Sisimiunut 160 km. Massakkut aamma sungiusarlunga, aappaagu ajunngikkuma aamma misileqqinniarlugu. Sisamariarlunga ACR imut peqataanikuuvunga, tassa imak oqaatigalugu, imminut unammillerneq nuannarisuuvara. Pingortarsuarput nukinnik aallerfigalugu imaannaangitsuuvoq.
Sunik ullaakkorsiortarpit suullu ullaakkorsiutiginaveersaartarpigit?
Ullaakkorsiortarpunga nammineq naqittakkannik bollunik, akugisarpai, rødbede, selleri, gulerødder, qaqqortarissat assigiinngitsut, honnigilerlugu. Pingaartikkakku ullaakkorsiutit
peqqinnartut nerissallugit, sivisuumillu kaannarnatik.
Sukkullit ullaakkortsiutigineq ajorpakka, qaqortuliat naliginnaasut aamma nerinaveersaartarpakka.
Ualikkut kagemut taarsiullugu suna ualikkorsiutigineqarsinnaava?
Uanga nammineq iipilit imaluunniit banaanit, naatitalluunniit arlaat.
Peqqinnissat eqqarsaatigalugu viitamiinitortarpit? Pisaruit sooq taakkua?
Kalkit, magnisium nukinnut iluaqutaasaramik, ullaakkullu imertarpara Breuss juice, naatitanik juiciliaq.
Mamakujunnut sodavandinullu taarsiullugu suna nerineqarlunilu imerneqarsinnaava?
Smootiesiliorneq juicelerlugu mamarivarput, imerlu nunatsinniittoq imerluartarlugu. Timi
Kiagussimatillugu peqqinnartuuvoq imerluartarnissaq.
Timiminnik aalatitsilerusuttunut sunik siunnersuuteqarsinnaavit?
Siunnersuutigissavara timeq aalatissimagaanni iluarusunneq takkuttarmat, pisuttuarnikkut
aallartinneqarsinnaavoq, unittoornaveersaarluni, imaak oqaatigalugu: piumassuseq nukiuvoq.
Ukiut 20-it qaangiuppata kommunetsinni peqqinnermut takorluukkat naatsumik oqaluttuariuk.
Neriupunga peqqinneq aalanerulerneq meeqqat atuarfianni aallunnerulerneqassasoq, taamaalilluni amerlanerusut timersornerulissammata.