Annga ilinniartitaanikkut, sunngiffimmi sammisassaqartitsinerup sulisinnaanngorsaanerullu iluini anguniagaqarusulluni ukkataqarumavoq. Ilinniartitaanermullu pisortatut atorfimmini angusaqarluarsimanera nutaanillu anguniagaqarusunnera Qeqqata Kommunianut neriulersitsilluarpoq.
Allaffeqarfimmi politikkikkullu atorfinitsitsinissami ataatsimiititaliamiittut isumaqatigiipput Annga Lynge pisortaanertut atorfinitsinneqassasoq, tamannalu Ilinniartitaanermut ataatsimiititaliamit Qeqqatalu Kommuniata Borgmesterianit akuersissutigineqarpoq.
Annga Lynge:
- ”Pisortaanertut sulilernissara qilanaaraara nuannaarutigalugulu toqqarneqarama. Meeqqat peqqinnartumik ilikkarfiulluartumillu ineriartornissaat ilinniartitaanermi immikkoortortamit annertuumik sunneeqataaffigisinnaavarput, meeqqerivimmiippata, meeqqat atuarfianniippata sunngiffimmiluunniit ornittakkaniippata, kissaatinniipporlu attuumassutillit tamarmik tamatuma anguniarnissaannut suleqataanissaat.”
Juliane Henningsen:
- ”Annga Lynge ukiorpaalunngortuni Qeqqata Kommuniani ilinniartitaanikkut siuarsaanermi siuttunut ilaavoq. Ilinniagai pisinnaasaalu tamakkerlugit Ilinniartitaanermut Pisortaanertut inissinneratigut atorluartussanngorpagut, neriulluaqaagullu siunissami Qeqqata Kommuniani ilinniartitaanikkut, piginnaanngorsaaqqiinikkut kiisalu sunngiffimmi sammisassat tungaasigut ineriartortitseqataalluarumaartoq.”
Annga Lynge martsip aallaqqaataa aallarnerfigalugu atorfinissaaq.