Kangerlussuup aamma Kangerluarsuk Tulleq (etape. 1) akornanni aqqusinermut ASN-imut nalunaarumi tusarniaanermi piffissaliussaq marsip qiteqqunneranut killeqarpoq. Pinngortitamut Avatangiisinullu Naalakkersuisoqarfik tusarniaanermi akissuteqaatinik arfineq-pingasunik maannakkut suliarineqartunik tigusaqarnikuuvoq.
Qeqqata Kommuniata neriuutigivaa, ASN-imik nalunaarusiaq Naalakkersuisunit kingusinnerpaamik maajip ingerlanerani akuersissutigineqassasoq. Tusarniaanermili akissuteqaatit peqqissaartumik suliarineqaqqaassapput.
Kangerluarsuk Tullerup Sisimiullu akiornanni aqqusinermut (etape. 2) ASN-imik nalunaarusiaq nutartigaq aammattaaq suliarineqaleruttorpoq aammalu 2020-mi apriilimi Namminersorlutik Oqartussanut nassiunneqassasoq naatsorsuutigineqarpoq. Immikkoortup taassuma Sisimiuni imeqarfiup killeqarfiata aqqusaarneqartarnissaanik unammillernartoqarnera suliassartarivaa.
Aqqusinniornermik aallartisarneq
Aasamut aqqusinniornermik aallartisartoqarnissaa Qeqqata Kommuniata pilersaarutigivaa, misigalugulu suliassamut annertuumik soqutiginnittoqartoq. Suliariumannittussarsiuussinermi atortussat tamanut suliariumannittussarsiuunneqangajalerput.
Tassunga atatillugu tallimanngornermi apriilip 17-ani entreprenørit, innuttaasut, tusagassiortut aammalu Sisimiut Kangerlussuullu akornanni angallannermut soqutiginnittut allat Qeqqata Kommuniata aggersarpai. Ullormi tassani Sisimiut Kangerlussuullu akornanni aqqusinissaq sinerlugu qamuteralannik angallattoqarsinnaaneranit Borgmester Malik Berthelsen immikkut akuersissuteqarpoq.
Aammattaaq ingerlaarfimmi aqquserngup inissisismanissaanut nunap assingi digitaliusut kikkulluunnit takusinnaavaat aammalu nunami misissuinerit assigiinngitsut suliariumannittussarsiuussinermilu atortussat atuarneqarsinnaallutik. Taakku kommunip nittartagaani pissarsiarineqarsinnaapput: www.qeqqata.gl/vejfoering
