Qeqqata Kommuniani Sisimiut aqutsiveqarfiani 2020-imi ukiaanerani umimmanniarneq aggustip aallaqqaataani aallartissaaq oktobarillu 15-iata tungaanut ingerlassalluni.
Piniarfimmut pisassiissutissat aalajangerneqarneri umimmaat 300-it ukiaanerani umimmanniarnissami Namminersorlutik Oqartussanit pisassiissutigineqarput.
Piniarfimmut pineqartumut killilikkamik pisassiisoqarnera pissutigalugu akuersissummik qinnu-
teqartitsineq ingerlanneqassaaq. Tamatuma kingorna qinnuteqartut akornanni makitsisoqassaaq, qinnuteqartullu amerlassusii apeqqutaallutik akuersissutit qinnuteqartunut ataasiakkaanut pisassiissutit qassiussanersut aalajangiisuussalluni.
Erseqqissaatigineqassaaq ukiaanerani umimmanniarnermi qamuteralaat ATV-llu umimmannik malersuinermi piniarnermilu atornissaat inerteqqutaammat.
Qinnuteqartitsineq nunaqarfinni kommunip allaffiinut, Sisimiuni kommunip Innuttaasunik Sullissivianut aammalu Sisimiuni piniarnermut aalisarnermullu siunnersortimut saaffiginninnikkut pissapput.
Ilisimatitsissutigineqassaaq qinnuteqarsinnaanermut piumasaqaataammat, inuussutissarsiutigalugu aamma sunngiffimmi piniarnermut allagartap atuuttup 1. maj sioqqullugu akilereersimanissaa aammalu qinnuteqartut 16-inik ukioqalereersimanissaat. Taamatullu sunngiffimmi piniarnermut akuersissutit inunnut ukiut kingulliit qulit iluanni ataavartumik ukiuni marlunni Kalaallit Nunaanni najugalittut inuit nalunaarsorsimaffiannut nalunaarneqarsimasunut ukiunilu qaangiuttuni marlunni nalunaarsorneqareersimasunut taamaallaat tunniunneqarsinnaanerat pillugu piumasaqaat atuutinneqarluni.
Sisimiuni sunngiffimmi allagartalinnut qinnuteqartitsineq ingerlanneqassaaq kommunip allaffiata Innuttaasunut Sullissivianut saaffiginninnikkut, kiisalu inuutissarsiutigalugu piniarnermut allagartallinnut qinnuteqartitsineq ingerlanneqassaaq aalisarnermut piniarnermullu siunnersortimut saaffiginninnikkut.
Ukiaanerani umimmanniarnissami qinnuteqartitsineq marlunngorneq 28. juli 2020 nal. 15.00 killeqarpoq.
Qeqqata Kommunia