Ukiumi atuarfiusumi 2019/2020-mi Qeqqata Kommuniani ukiumi klassitsialak tassaavoq Minngortuunnguup Atuarfianeersoq 5.a, 2020-mi aggustip qulingani atuartut atualeqqaarnerannut atatillugu akissarsiaminnik tigusillutik. Kommunimi ukiup klassitsialaatut taaneqarnermut checki 25.000 koruuninik nalilik malinnaavoq, klassip paasisassarsiorluni angalanermut aningaasat atorneqarnissaat naatsorsuutigivaat. Ukiup klassitsialattut akissasiaq kommunimi pisortaanermit Juliane Henningsenimit tunniunneqarpoq, taanna aammattaaq klassimut angajoqqaajusunullu naatsumik oqalugiaateqarluni.
5.a angajoqqaavisalu ukiup klassitsialaattut toqqarneqarneranut tunngavilersuutaasoq tassaavoq, angajoqqaajusut meeqqamik atuarnerat pillugu akuulluarnerat. Paasisassarsiorluni angalanissamut aningaasanik katersinermi sulisarput, aammalu angajoqqaat tamangajammik ataatsimiinnerni peqataasarput peqataasinnaanngikkaangamillu nalunaaruteqartarlutik. Angajoqqaat ataatsimiinnissatik namminneerlutik aaqqissuuttarpaat, tassani aamma nereqatigiittarlutik. Imminnut pisussaaffilertarput kivitseqatigiittarlutillu, angajoqqaalli tapersersorneqarnissamik pisariaqartitsisut ataqqisarlugit. Ulluinnarni atuartuutiminnut kaammattuisuupput tapersersuilluartuullutillu, amerlanerpaat meeqqatik piareeqqatillugit atuariartortittarpaat, ilinniagassaqartillutillu ilinniakkeriuaannarsimasarput. Atuarfiup ataqqineqarnissaanut angajoqqaat aammalu angajoqqaat akisussaanerata nukittorsarneqarnissaanut pilersitseqataapput.
5.a-mi atuartut kammagiilluarput, assigiinngissutsiminnik ataqqinnittut, sulitikkuminartut sulinissaminnullu piumassuseqartut. Ikiuukkumatuujupput namminnerlu isummatik oqaatigisinnaallugit.
Ilinniartitaanermut ataatsimiititaliap siulittaasua Evelyn Frederiksen akissarsiaq pillugu ima oqaaseqarpoq: ”Meeqqat atuarfiannik pitsaasumik pilersitsinissamut angajoqqaat akuunerat pingaarutillit ilagivaat. Taamaattumik immikkut suliniuteqarluarsimasut kaammattorusullugillu akuersaarpagut. Toqqaaneq angajoqqaanut allanut pitsaasumik meeqqap atuarnerminni qanoq akuusinnaanermut isumassarsititsissasoq neriuutigaarput.
Illoqarfinni nunaqarfinnilu meeqqat atuarfianni immikkut suliniuteqarsimasunut, kajumissaatitut akissarsiassat assigiinngitsut arlaliusut ukiup klassitsialaanut akissarsiassaq tunniunneqartartunut ilagiinnarpaat. Ilaatigut meeqqat atuarfiannik naammassinnillutik qaffasinnerpaamik agguaqatigiisillugu karakterilinnut, annikinnerpaamik atuanngitsoorfiunikunut imaluunniit arlaatigut maligassiuisuusunut kajumissaatitut akissarsiassanik tunniussisoqarnikuuvoq. Taakku saniatigut atuarfinni ataasiakkaani klassimut ikinnerpaamik atuanngitsoorfiunikumut kiisalu atuartitsisutsialammut akissarsiassanik tunniussisoqarnikuuvoq.
Annertunerusumik paasisaqarusukkuit uku attavigikkit:
Ilinniartitaanermut ataatsimiititaliap siulittaasua Evelyn Frederiksen
evfr@qeqqata.gl, oqa. 52 59 55
Ilinniartitaanermut Aningaasaqarnermullu pisortaaneq Annga Lynge
anly@qeqqata.gl, oqa. 86 73 80
