Kommunmi meeqqat atuartut akornanni 2018-imi misissuinerup takutippaa, Qeqqata Kommuniani 9. aamma 10. klassini 29 procentii pujortartartuusut, 14 procentit putumallutik imersimasut aammlau 11 procentit ikiaroornartumik misiliisimasut. Pissusermik taassuminnga pitsaaliuineq ilaatigut meeqqat inuusuttullu pitsaaasumik ataatsimoorfeqartinneqarnerinit peqqinnartunilu sammisassaqartinnerisigut pissaaq.
2018-imi oktobarimi Kommunalbestyrelsi Islandimut tikeraarpoq, tassanilu Den Islandske Model (Islandermiut periusaat) sulinerat isumassarsiffigalugu. Islandimi 20-t sinnerlugit Europami Inuusuttut imernerpaajullutillu pujortarnerpaajunikuulluni, nunangornikuuvoq inuusuttuni annikinnerpaamik pujortarfiullunilu imerfiusoq. Island ilaatigut piukkunnaatilinnik sungiusaasoqarluni timersornermut sunngiffimmilu sammisassanik pitsaasunik neqerooruteqarnermik atuutsilersitsinikuuvoq aammalu meeqqanut inuusuttunullu angerlareersimanissamut pffissanik atuutsitsilernikuulluni. Islandip iluatsitsilluarneranut angajoqqaat akuunerat pingaaruteqartorujussuvoq.
Den Islandske Model-imik suliaqarnerup ilaatut 18 ataallugit ukiulinnut tamanut timersornermi sammisanut akeqanngitsumik peqataasarnissaq 2020-mi januaarimi Kommunalbestyrelsip atuutilersippaa. Meeqqat inuusuttullu akeqanngitsumik timersorsínnaanerat kissaataanngitsumik pissuseqarnissaq pinaveersaartissavaa aammaluu sunngiffimmi akuulluni inooqataanermik toqqaanissamut pitsaasunik sinaakkutinik pilersitsissaaq. Islandip takutinnikuuvaa, meeqqat inuusuttullu aalasartut pitsaaasumik peqqinnartumik imminnut attassuteqaqatigiinnissamut periarfissagissaarnerusartut. Timersoqatigiiffiit ingerlalluartunik nutaaliaasunillu atugassaqartitsinissaat pingaaruteqarpoq, taamaattumillu Qeqqata Kommunia 2020-mi timersoqatigiifiit timersornermi atortunik pisinnissaannut immikkut tapiissuteqarnikuuvoq. Kommunip aammattaaq suliniutigivaa, peqatigiiffiunissaq ajornaannerussasoq. Taamaattumik nittartagaliortartumik aamma online systemimik suliaqartartumik BRND Booking ApS suleqatigiinnermik aallartitsoqarpoq, peqatigiiffiit siunissami ilaasortaminnik nalunaarsuinermut, ukiumut naatsorsuutinik tunniussinermut, malittarisassank toqquinermut, tapiiffigineqarnissamik qinnuteqaasiornermut, meeqqanik pinerliisimannginnermut uppernarsaatinik tunniussinermut allarpassuarnullu atorsinnaasaat.
Den Islandske Model-imi suliniutit tamarmik pitsaaliuineq aamma meeqqat inuusuttullu pissusaat pillugit paasissutissanik aallaaveqarpoq. Qeqqata Kommuniani meeqqanik atuartunik misissuinerup HBSC nalinginnaasumik ukiut sisamakkaarlugit ingerlanneqartartuusoq, siunissami akulikinnerusumik ingerlanneqartalissaaq. Misissuineq tulleq 2020-mi aggustimi/septembarimi atuartut 5.-10. klassit akornani ingerlanneqassaaq. Peqataasuni soorlu ilaatigut atuarfinni, peqatigiiffinni, sunngiffimmi neqeroorutini aamma angajoqqaani inernerit tunngavigalugit suliniutinik aallartitsisoqassaaq. Meeqqat atuartut misissuiffigineqarnerat malitsigisaanillu suliniutinik atuutilersitsinissaq pillugu HBSC Grønland, Kalaallit Nunaanni Center for Folkesundhed aamma Paarisa Qeqqata Kommuniata suleqatigivai. Innuttaasut angajoqqaallu sulinermi ingerlaavartumik paasitinneqartarlutillu akuutinneqartassapput.
Suliniut suliniutip "Inuunerissaarneq" ilagivaa, innuttaasut tamarmik inuunerisa pitsaassusaannik pitsanngorsaanissamik siunertaqartuusoq.
Annertunerusumik paasisaqarusukkuit uku attavigikkit:
Qeqqata Kommuniani Borgmesteri Malik Berthelsen
mabe@qeqqata.gl, oqarasuaat 86 73 00
Ilinniartitaanermut pisortaq Else Finne
elfi@qeqqata.gl, oqarasuaat 86 73 25
