Qeqqata Kommuniata innuttaasut tamarmik kommunimut saaffiginnittut pitsaasumik misigisaqarnissaat kissaatigivaa. Tamanna assersuutigalugu innuttaasunik sullissivimmut saaffiginnittarfimmulluunniit, innuttaasut kommunimi naapittagaat siulliukkajuttunut atuuppoq. Taamaattumik sulisut Sisimiuneersut Maniitsumeersullu ulluni marlunni innuttaasunik sullissinermut pikkorissarnikuupput kalaallisut ingerlanneqartumut.
Isikkivik Konsulent, Heidi Møller, pikkorissaasuuvoq. Taanna oqaluttuarpoq, pikkorissaanermik siunertaasoq tassaasoq, Qeqqata Kommuniani innuttaasunik sullissinerup ineriartortinneqarnissaa, ilutigalugulu sulisut sakkussaqalissallutik inuiaqatigiinni pingaartitanut ingerlaavartumik ineriartortuusuni atorsinnaasaminnik.
”Sullissinermi piginnaasat eqqaaqqinneri aammalu kikkut sullinneqarnersut paasineri nuannerpoq. Ilutigitillugu Qeqqata Kommuniani ataatsimut pingaartitagut eqqaaqqillugit aammattaaq nuannerpoq", pikkorissarnermi peqataasut ilaat Emma Jensen nassuiaavoq.
Kommunimi pisortaanermut Juliane Henningsenimut pingaaruteqarpoq, innuttaasut kommunimut saaffiginninnerminni pitsaasumik inuppalaartumillu sullinneqartutut misigisimasarnissaat.
”Illup iluani avataanilu pitsanngorsaanernik pilersitsiniarluta suliuaannarpugut taamaammallu uannut pingaaruteqarpoq, sulisut ulluinnarni sulinerminni atorsinnaasatut misigisimasaminnik sakkussanik pissarsiaqarnerat. Pikkorissartut pissarsiaqarluarnartumik misigisimanerat nuannaarutigaara”, Juliane Henningsen oqarpoq.
Qeqqata Kommuniata pikkorissarnermi oqariartuutaasut sulinermi atorneqalernissaannut qilanaarpoq.
Annertunerusumik paasisaqarusukkuit uku attavigikkit:
Juliane Henningsen, Kommunimi pisortaaneq
juhe@qeqqata.gl, +299 86 73 01
