Qeqqata Kommuniata pisortat suliffeqarfiutaattut atuilluartuunissamik kiisalu suliffeqarfiup peqqinnartuunissaanik immikkut sammisaqarpoq kajumissuseq, akisussaaqataaneq, ataatsimoorneq, pisinnaasatigut ineriartortitseqatigiinneq, oqaloqatigiinnerlu pingaartitaralugit.
Ukiut tamaasa Qeqqata Kommuniani suleqatitsialannik marlunnik toqqaasoqartarpoq, ataaseq Kommunip qitiusumik allaffissuanit ataaserlu toqqarneqartarluni kommunip ataani suliffeqarfinnit soorlu atuarfinniit, meeqqerivinniit suliffiillu assigisaanniit.
Qitiusumik allaffeqarfimmi ukiormanna 2020-mi suleqatitsialattut toqqarneqarpoq: Pedeli Karl Tobiassen.
Kaaleeqqap ileqqorivaa qungujunnartunik oqaaseqalaarnissani quianartumilluunniit naapitaqarsimagaangami oqaluttuarissallugu. Inuk saamasuugami ilagalugu toqqissisimanartuuvoq. Ullut tamaasa immikkoortortaqarfiit aqqusaartuaannarpai ataasiaannarani suliassat isumagalugit ikiuukkiartorluniluunniit. Suliassamik tunineqaraangami apeqqusernagu naammassisarpaa. Ukioq 2019 apriilip aallaqqaataanili sulilerami napparsimassanani suliuaannartuuvoq, taamaammat naatsersuutigineqartuaannarpoq. Kaalinnguaq ileqqorinnermigut takkuttuaannarnermigullu tamatsinnut maligassiuisuuvoq malitassaqqissoq.
Qitiusumik allaffissuup avataani ukiormanna 2020-mi suleqatitsialattut toqqarneqarpoq: Pisoq-mi kontorfuldmægtigi Mettea R. Jeremiassen.
Mettea arnaavoq suliffimminut ataqqinnittoq, sulisorpassuit ataatsimut suleqatigiilluarnissaannut aamma suliffiup nuannersuunissaanut suliniutilik. Sulisorpassuarnut ataqatigiissaarisinnaalluarpoq, toqqissisimatitsisuullunilu. Kinaagaluartorluunniit tusarnaassallugu siunnersorlugu kajumissaarlugulu pisinnaavaa, allaat sulisorpassuit suliffimmik nuannarinnilernerat angusinnaallugu. Aalajaatsuuvoq piumassusilik, inussiarnersoq, ataqqinnittoq, toqqissisimasorlu. Arlaannik pisoqarpat aalajaalluinnarluni kinaassusersiorani ikiuisarpoq.
Ukioq mannalu 2020-mi immikkut ittumik sulisutsialammik nersorinnittoqarpoq: Sulisoqarnermut siunnersorti, Inga Olsen.
Qeqqata Kommuniani Inga ilisarisimaneqarluarpoq, tassami ukiorpaalunngortuni sulisuuvoq. Ukioq 2019-i aamma 2020 Ingamut sakkortuumik misigisaqarfiupput. Nappaammik kræftimik eqqorneqarnermi kingorna 2019-imi timimi ilaa pilatsilluni annaavaa, maannakkullu innarluuteqaatigalugu. Aammattaaq ilaqutaani qanittut arlaqartut nappaammit eqqorneqarput, ilaqutariinnut annertuumik sunniuteqartumik.
Innarluutinikkaluarluni inuuvoq suliffimmini tunniusimasoq, inoqatiminut ataqqinnittoq, kissalaarnermik tunioraasoq suleqatikkuminartorlu, suliaminullu pikkorilluinnarluni sulivoq. Suleqatitut innarluuteqalersimanera eqqaamajuminaattarpoq, nuannaartuarnera pissutaalluni. Inuunermik paasinnittuuneq, pisunik akuerinnissinnaaneq siumullu isigaluni inuunermik ingerlatserusunneq pigivai, tamannalu nipangiutiinnarnagu suleqatiminut eqqartortarpaa taamatut isiginninngitsunut allannguerusunnermik kinguneqalersitsisumik.
Pisortaqatigiit Ukiormanna suleqatillatsialammik toqqaanissaminnut toqqammavissanik sisamanik aallaaveqarput, tassaallutik:
* Suliffimmi pitsaasumik atugassaqartitsineq
* Ataqatigiissitsisinnaassuseq
* Ikiuisinnaassuseq kajumissaarisinnaassuserlu
* Aalajaatsumik suleqataassusilik'
Annertunerusumik paasisaqarusukkuit attavigiuk:
Qeqqata Kommunia, HR-mi pisortaq, Johan Davidsen
Oqarasuaat: (+299) 86 73 27 / E-mail: joda@qeqqata.gl
