Pikkorissaanerup siunertaraa, sulisut kommuunimilu akimortumik suleqatigiissitat inuusuttunik, angajoqqaanik kiisalu ilaqutariinnik sullissisut piginnaanngorsarnissaat. Sullissisut kommuunimilu sulisut pingaarutillit, ulluinnarni inuusuttunik angajoqqaanillu sullissisut, aammalu suliffeqarfiit kommunip ataaniittut; nunaqarfinni sulisut, Peqqinnissaqarfiit, Kriminalforsorgi kiisalu atornerluisunik katsorsaasut, pikkorissaanermi peqataatinneqarput.
Atugarissaarnermut Immikkoortortami sullissisuusoq, Amalie Kleist, pikkorissarnermini misigisaminik oqaluttuarpoq: "Misigisimavunga piareersimanerulerlunga sakkussaqalersimallungalu, qanoq iliorlunga meeqqat inuusuttullu hash-imik atornerluisut oqaloqatigisinnaanerinut. Siornatigut ilisimavallaanngilara qanoq inuusuttunut oqaloqatigiinnermik pitsaasumik ingerlatsisoqarsinnaanera. Nuannerpoq taamatut sakkussaqalerluni aammalu suut mianersuutassaanersut maluginiarnerulerlugu ".
Mette Scharling Laursen, Qeqqani MISI-mi Maniitsumi siunnersortaasup, pikkorissarneq assut pissarsiaqarnarnerarpaa, "Inuusuttut hash-imik atornerluisuusut” pillugit pikkorissarneq assorsuaq isumassarsiffiuvoq, aamma tassanngaanniit sakkussakka assigiinngitsut angerlaappakka. Pingaartumik oqaloqatiginneriaatsit periutsillu aaliangersimasut, soqutiginartuusut atorfissaqarluartullu isumaqarpunga. Takusinnaalluarpara, ulluinnarni Qeqqani MISI-mi sulininni atorfissaqarsinnaasut. Tamatuma saniatigut paasisaqarluarpugut, hashi aanngajaarniut sunaanersoq, kiisalu paasisaqarfigalugu timerput eqqarsartariaaserpullu qanoq sunniivigisarai".
Borgmesterip Malik Berthelsen-ip eqqaavaa, taamatut pikkorissarneq suliuniutit ingerlaavartut ilagigaat, kommunimi peqqinnermut pitsanngoriaataasussaq. "Peqqinneq pinaveersaartitsinerlu ataatsimoorullugit akisussaaffigaagut, ataatsimut kivitseqatigiinnissaq anguniarlugu suleqatigiinnissarput pisariaqarpoq. Uumap suliniutip pinaveersaartitsineq tapersersuinerlu aalluppai, kommuunimi oqartussat assigiinngitsut akimortumik suleqatigiinneri pitsanngorsarnerisigut pinerluttarneq hash-imillu atornerluineq annikkillisinniarlugit ".
Qeqqata kommuniani suliniutip "Inuunerissaarneq - Det gode liv" ataani suleqatigiissitaq "Siusinaartumik iliuuseqarneq" qulequtaralugu suliniueqartoq, Komphash-imi piginnittoq aqutsisorlu Roskilde-meersoq, Christopher Schmitz, suleqatigalugu pikkorissarnerit ingerlassimavaat.
Annertunerusumik paasisaqarusukkuit uku attavigikkit:
Amalie Kleist, Sullissisoq
Oqar.+299 86 74 37, e-mail: amkl@qeqqata.gl
Sofie Jessen, Ineriartornermut pisortaq Maniitsoq
Oqar.+299 81 78 49, e-mail: soje@qeqqata.gl
