Ukiuni kingullerni Sisimiuni Maniitsumilu piginneqatigiilutik illuliornerit qujanartumik sanaartornermik annertusaaqataallutillu inissaaleqisunik ikilisaaqataasimapput, tamannalu soorunami nuannaarutissaavoq.
Taamaakkaluartoq Namminersorlutik Oqartussaniit aningaasat tiguneqartut piginneqatigiilluni illuliorniartunut, assersuutigalugu peqatigiiffimmut ataatsimut 12-inik inissiartaqartunut taamaallaat naammattarmata, kommunip karsia illersorniarlugu kommunalbestyrelse aalajangerpoq, ukiumut illuliornermut iluarsartuussinermullu aningaasaliissutit nungukkaangata allatut ajornartumik ukiup sinnerani qinnuteqaatit nutaat itigartinneqartalissasut.
Tassami assersuutigiinnarlugu Sisimiuni Maniitsumilu piginneqatigiilluni illuliorniartunik ataatsikkut kommuni tigusaqaraangat aappaannaanut aningaasat ilumoortumik taamaallaat naammattarput. Ullumikkutuulli piginneqatigiillutik illuliorniartut siunissami taamak amerlatigiinnassappata aningaasaliissutillu Namminersorlutik Oqartussaniit qaffanneqanngippata, kommunip karsianut artukkiisinnaanerat ernumanartutut kommunalbestyrelsemiit nalilerparput. Pissutigalugu killiliinissamik aalajangerneq sioqqullugu sanaartornerup ingerlaannarnissaa tapersersorlugu qinnuteqaatit tamarmik akuerineqartaraluarput. Taamatulli ingerlaannarnisaaq kommunip aningaasaataasa tigoriaannaataanut ulorianartorsiortitsisinnaavoq.
Aningaasaliissutit annertussusaat eqqarsaatigalugit kommunimut orniginarnerpaavoq, piginneqatigiilluni inissiarliornerminngaanniit innuttaasut namminneq pigisassaminnik, Illuliortiternernut aningaasalersuineq pillugu Inatsisartut inatsisaat nr. 39, 23. november 2017-imeersoq, siusinnerusukkut 20-20-60-imik taaguuteqarsimasoq atorlugu illuliornerunissaat. Pissutigalugu taamaasiornikkut illut amerlanerusut pilersinneqarsinnaammata innuttaasullu amerlanerusut taamaasillutik pisortaniit atukkinneqarsinnaassammata. Tamatumunnga pissutaavoq piginneqatigiilluni inissialiornerit annertunerungaatsiartumik atukkinneqartarnerat piffissamilu sivisunerusumi taarsersuilernissaminnut periarfissaginnerunerat. Assersuutigalugu nammineq pigisassamik nutaamik illuliornerminngaanniit illumut ataatsimut 550.000kr. tikillugit annertunerusumik pisortaniit atukkinneqarnissamut ukiunillu 10-inik sivisunerusumik, tassa katillugit ukiut 30-it aatsaat qaangiunneranni aningaasanik taarsersuillutik aallartinnissaminnut periarfissaqarput.
Oqaatigeqqissavarput piginneqatigiilluni inissialiornerit soqutigineqarluarnerat soorunami nuannaarutissammat. Innuttaasunillu amerlanerusunit periarfissap atuinnarneqarnissaa Inatsisiliortunit kissaatigineqarpat, taava Namminersorlutik Oqartussat aningaasaliissutitik qaffattariaqarpaat.
Innuttaasut assigiimmik periarfissinenqarnissaat anguniarlutigu, piginneqatigiilluni inissiliorniartunut aningaasanik qinnuteqarfissat ullunut ukununnga inissinneqarput. Qinnuteqarfissaq siulleq tassaavoq 31. martsi aappaalu 31. september.
Nutaamik illuliornissamut, piginneqatigiilluni inissialiornissamut aserfallatsaaliinissamulluunniit attartornissamut periarfissanik annertunerusumik paasisaqarusukkaanni, Inatsisartut inatsisaat nr. 39, 23. november 2017-imeersoq misissorneqarsinnaavoq.