airplanebooksbriefcase business cogs cross election entertainment fish house law lockmedicalpeopleselfservices socialtax

Kommuni pujortarfiunngitsoq

Puigunngisaannarpara Qallunaat Nunaanniit nakorsanngorniat ilaata Sisimiuni sulinngiffeqarluni tikeraarnernermini meeqqat ilaat pujortartoq takusimasani assorujussuaq tupigusuutigalugu uannut oqaatigisaa. Ilumoortumimmi aamma meeqqap pujortarnissaa pissusissamisuunngikkaluarami.

Ajoraluartumilli atuartut peqqissusaasa misissuivigineqarneranni takusinnaavarput meerartagut 7-8.klassemi atuartut pujortartarlutik aallartittartut aammalu 9-10.klassemut pigaangamik ajoraluartumik malunnartumik amerleriartartut, tassa 15-16-inik ukiullit 30%-ii ullut tamaasa pujortartartuusarlutik. Nunatsinnilu innuttaasut peqqissusaasa misissuivigineqarnerini takusinnaavarput ukioqqortusiartornerminni pujortartartut ajoraluartumik suli amerliartortartut, tassa 15-24 akornganni ukiullit 62%-ii ullut tamaasa pujortartartuusarlutik.
20. maj 2021

Tamannalu Inatsisartut Aningaasanut Inatsisaanni takuneqarsinnaavoq inuiannguani 56.000-iinnarnik inulimmi, tupat akitsuutaannaasigut nunatta karsiata ukiumut 146mio.kr. isertissallugit naatsorsuutigigai, malugalu aali akitsuutaannaasigut.

Kommualbestyrelsemilu tamanna allanngortikkusupparput!  Angorusupparput Qeqqani innuttaasut tassaassasut nunatsinni tupamik atuinnginnerpaasut. Tamannalu anguniarlutigu kommunalbestyrelsemi suleqatigiilersugut suleqatigiinnissamik isumaqatigiissutitsinni isumaqatigiissutigivarput kommunip susassaqarfiini tamani, tassa meeqqerivinni, atuarfinni, utoqqaat angerlarsimaffiini, inulerisuni, aqqusinilerisuni allaffeqarfissuarnilu sulisut tamaavimmik sulinerup nalaani 1.maj 2022 aallernerfigalugu pujortaqqusaajunnaarnissaat. 

Taamatut aalajangernitsinnut pissutaavoq, meerartatta tupamik atuisunik isigisaat annikillisikkusukkatsigu neriuutigigatsigulu tupap takussaajunnaarsinneruneratigut inuusuttuarartagut pujortarneq ajortut suli amerlanerulernerannik kinguneqarumaartoq.

Kommunimi 1.300 missaanik sulisoqaratta  soorunami aamma neriuutigaarput taamatut aalajangernerput kommunimi innuttaasut akornganni tupamik atuinermik annikillisitseqataajumaartoq  aammalu peqqinnartumik inuuneqarnerput tupamillu atuinnginnerpaanerput pillugit siunissami nuannersumik nunatsinni tusaamaneqarnissarput angujumaaripput.

Ukiup ataatsip aatsaat qaangiunnerani atuutilersinnissaannut pissutaavoq, ilisimagatsigu ileqqut suulluunniit ingammik peqqinnanngitsut imaasiallaanarlugit unitsinnissaat ajornartartoq aammalu pujortarunnaarnissamut pikkorissarnissanik aaqqissuussinissamut piffissaqartariaqarnissarput pingaartissimallutigu.  

Isumalluarpugullu ukiut sisamat qaangiuppata tupap kimmivikullu kommunitsinni takussaajunnaarnerunissaannut.

 

All.: Malik Berthelsen, borgmester