Ukiup qaammatai kingulliit qanilliartorput, 1984-miillu ukiut tamaasa Sisimiut kommunalbestyrelsiat ileqquusumik inummik imaluunniit inunnik innuttaasut akornannit inassuteqartoqarnikkut nersornaasiisarluni.
Nersornaat allagartalerlugu tunniunneqartartoq "Sisimiut Kommuniata Nersornaasiisarnermut aningaasaateqarfia"-nit aningaasanik ilaqartinneqartarpoq.
Aningaasaateqarfiup siunertaraa Sisimiut Kommuniata nersornaasiuttagaata tunniunneqartarnissaa, inunnut immikkut malunnaatilimmik nersortarialimmillu soqutiginninnermik, eqiasuissutsimik nammineersinnaassutsimillu Sisimiut Kommuniata iluani (Sarfannguani, Itillimi Kangerlussuarmilu) takutitsisimasunut, taamatullu nersornaasiisarneq ukiumut ataasiarluni pisarpoq kommunalbestyrelsip aaliangiineratigut, soorluttaaq kommunalbestyrelsimit aaliangerneqartartoq inuit nersornaasigassat qassiussanersut aningaasartassaallu qanoq amerlatigissanersut.
Nersornaasiinissaq ukioq manna aammattaaq pisussaavoq, taamaattumik kommunalbestyrelsi matumuuna kaammattuivoq inuit ataasiakkaat, peqatigiiffiit soqutigisaqaqatigiillu 2021-mi nersornaasigassanik toqqaaniarnermi peqataaqqul-lugit, kommunalbestyrelsimullu siunnersuutit nassiunneqartussat tunngavilersorluarneqarsimasariaqarput.
Erseqqissaatigineqassaarlu, inuit ataasiakkaat nersornaaserneqartussatut imminnut siunnersuutigisinnaanngimmata, kiisalu siunnersuuteqartoq nuliaminik uimi-nilluunniit, eqqarlerisaminik imaluunniit ningaarisaminik ukuarisaminilluunniit killormullu sakiminik aammalu soorlu soralussatut qanitsigisumik eqqarlerisaminik siunnersuutigisaqarsinnaanngimmat.
Siunnersuutigineqartut kommunalbestyrelsimut tunniunneqareersimassapput kingusinnerpaamik ataasinngorneq novembarip 15-ani 2021.
Decembarip qaammataani nersornaasiisoqassaaq.