Kalaallit Nunaannilu suliffeqarfiit namminersortut kalaallinit pigineqartut akuttugallarmata Akannguaq Sisimiuni sanasutut namminersortutut 1955-imi aallartippoq, 2013-milu ukiuni 58-ni namminersortooreerluni aatsaat unilluni. Ukiunilu taamak amerlatigisuni namminersortuunermini Sisimiuni ineriartornermut annertuumik malunnaateqarluni peqataasimavoq, soorlu ilaatigut Sisimiut Timersortarfiata, Arnat ilinniarfiata, Paamaap Kuuani blok 13-14, Nalunnguarfiup Atuarfiani blok 4-5, kolligiat, Taseralik aammalu Tele Post sanaartorsimallugit. Isumaqarpungalu ukiuni 58-ini suliffeqarfiata piusinnaanera tupinnartuullunilu nersortariaqartoq. AkánnguaK` inuttut nuimaniartuunngikkaluarluni sanaartornerup iluani suliffissaqartitsiniarnikkut inuusuttorpassuillu sanasutut ilinniarneranni naammassitittarnikuugamigit illoqarfitsinni annertuumik malunnaatilimmik sunniuteqarlunilu inuusimavoq, taamaakkamilu nunaqqatiminit ilisarisimannitserpassuaqarpoq. Sanasuunermilu saniatigut suliffeqarfiit ukua pilersitseqataaffigisimavai, Sisimiuni Brugseni pilersinniarneqalermat, Arssarnerit aammalu kilisaataatileqatigiiffik Nataarnaq.
Akánnguak´ naapillugu tamatigut inussiarnisaartuaannarpoq qungujunnarsinnaasunillu oqaaseqarnissani nuannarisarmagu naapillugu tamatigut qungujulaarfiusarpoq. Pissutsinilu tamanna aamma napparsimalereeraluarluni attatiinnarpaa, naallu peqqiilliulereeraluarluni naapillugu aperigaanganni qanoq innersoq, tamatigut ajunnginnerartarpoq taamaallaallu nissuni ippigusuutigalugit qungujunnartunngorlugilli uparuartarpai. Qungujunnarsinnaasulli saniatigut inuiaqatigiinni pisunik ilaatigooriarluni isummersorfigisarpaanga. Uggorivaralu mittarfimmut biileqatigiumallunga kissaataata naammassinissaa angumerinnginnakku, tamannalu ajuusaarutigaara. Qujanartumilli qitornaaniit paasivara suna uannut apuukkusussimaneraa.
Akánnguaq nulianilu Emma ilaquttaminnik pingaartitsisuupput takorloorsinnaavaralu qitornamik ilinniagaqarsimasuunissaat imminnullu pilersortuunissaat kissaatigalugulu pingaartissimassagaat.
AkánnguaK` ukiorpassuarni eqiasuilluni inuiaqatigiinnilu sunniuteqarluarluni suleqataasimanera pissutigalugu, Sisimiut Kommuniata nersornaasiuttagaanik 1987-imi Namminersorlutillu Oqartussat nersornaasiuttagaannik sølv-imik 2008-imi nersornaaserneqarnikuuvoq.
Akánnguup nulianut kinguaavinullu misiginneqataanerput matumuuna apuuppara.
Eqqaaneqarneralu ataqqinartuuli.
Malik Berthelsen, Borgmesteri