Martha Lund Olsen-ip toqqarneqarnerata tunuliaqutigaa, atugarissaarnermut immikkoortortaqarfimmi sulianut ilisimasaqarluarmat, tassani ilaqutariinnermut immikkoortortami qullersatut atorfeqarnermini Kommuneqarfik Sermersuumi aamma siusinnerusukkut Namminersorlutik Oqartussani kusanartunik angusaqarsimammat.
Kommunimi Pisortaaneq Juliane Henningsen Heilmann oqarpoq; “Qeqqata Kommuniani ukiut kingullerni atugarissaarnermut immikkoortortaq, meeqqanut aamma inuusuttunut immikkoortortaq, inunnut innarluutilinnut, utoqqarnut aamma ilaqutariinnermut immikkoortortap ineriartortinneri qitiutittorujussuunikuuagut. Martha Lund Olsenip suleqatiginissaanut taamaalilluta qilanaartorujussuuvugut. Martha atugarissaanermut immikkoortortami annertuumik misilittagaqarpoq, upperaara Martha siuttoralugu politikkikkut anguniakkat angujumaarlugit.”
Martha Lund Olsen oqarpoq;” Ukiut 35-t matuma siorna isumaginninnermi siunnersortitut atorfineqqaarfinnut uteqqinnera nuanneqaaq”. Martha Lund Olsen 60-inik ukioqartoq, ukiut 16 kingulliit isumaginninnermi immikkoortortami qaffasissumik suleqataasimavoq, imalu nangippoq;” Atugarissaarnermut immikkoortortaqarfiup tamarmiusup suliffiginissaa pissanganartippara aamma suleqatitaassama aamma kommunalbestyrelsip suleqatiginissaa qilanaaralugit”.
Martha Lund Olsen Kommuneqarfik Sermersoorminngaanneerpoq aamma Qeqqata Kommuniani Atugarissaarnermut pisortaanertut atorfinissalluni ulloq 1. marts 2022.
Paasissutissat sukumiinerusut
Juliane Henningsen Heilmann
Kommunimi Pisortaaneq
Juhe@qeqqata.gl
Mobil: +299 488148