Marius Olsen aalisartutut malunaatilimmik inuuniuteqarnermi saniatigut, inuiaqatigiinni akisussaaqataanerminik pingaartitseqataanermigut, peqatigiiffilerinermik kattuffilerinermillu
suleqataasarsimavoq aammalu utoqqanngoreeraluarluni toqussi tikillugu KNAPK-p immikkoortortaqarfiani Sisimiuni Aalisartut Piniartullu Peqatigiiffianni akuusimallunilu pingaarutilinnik isummersoqataasarsimavoq.
Ukiorpassuarni eqeersimaarluni suleqataasimanera pissutigalugu SAPP-imi aammalu Siumut Sisimiuni ataqqinaammik ilaasortaavoq aammalu Niels Carlo Heilmannip Nersornaasiisarnermut Aningaasaateqarfianiit nersorneqarsimalluni. Taamaakkamilu qiimasuunermigullu Sisimiuni nunatsinilu ilisarisimannitserpassuaqarpoq.
Mariusilu inuiaqatigiinni pisunik malinnaasuugami ilaatigooriarluni allaffinnut alakkarluni sianerfigalungaluunniit isummaminik apuussivigisarpaanga. Mariusimullu nuannersumik eqqaamasarpara panimma angajulliup pingasut missaanik ukioqarnerata nalaani kommunabestyrelsemut qineqqusaaqatiginerata nalaani, Marius TV-ikkut nuisoq panimma suaarmanga, ”Ataataa suleqatit Kariusi!”, sunaaffa atia Karius aamma Baktus-imut eqqaanartissimallugu paarlaakkaa. Soorunami inuttaanut nuannaralugu oqaluttuarivara.
Marius inuusutunnguullunili ataatami angallataani inuttaalluni ingammik atuakkiamini nammineq allanneratuut nukatsitaanngeqaluni suleqataalersimanera eqqarsaatigissagaanni, tupinnanngilaq inuiaqatigiinni suleqataanissaminut pingaartitsisuunera.
Tassami inuusuttunnguullunili aalisartunngorami takorlooreersimavaa nammineq aalisariutissaminik angallatitaarnissani aammalu imak pikkoritsigalunilu sapiitsigisimavoq allaat 16-iinnarnik ukioqarluni ataatami angallataanik avannamut raajarniariarnerminni naalagaasimalluni. 19-iinnarnillu ukioqarluni 1965-imi 42fod-imik raajarniutaajutigaluni tikaagullinniutaasinnaasumik angallateqalerpoq, ukiullu 20-it missaani piginerani tikaagulliit 200-250 missaaniittut pisarisimallugit. Tassuunakkut takuneqarsinnaavoq Marius namminneersinnaanerminik taamanili pingaartitsisuusimasoq.
Marius 2001-imi kommunalbestyrelsemut ilaasortanngorami ernguttani ikiortigalugit qarasaasiartaarsimavoq, taamaasillunilu inuunermini pisarsimasut assigiinngitsut eqqaamasani allaaserisimallugit. Qujanartumillu allaaserisarsimasani atuakkami ‘Malissuit ataanni’ suli peqqinermini saqqummersinnissaa angumerivaa. Taamaasilluni aalisartutut piniartutullu inuuniuteqarsimanerminit misigisimasarpassuani taamanikkullu inuunerup qanoq ittuusimaneranik kinguaariit tullii qaqugumulluunniit qimerloorsinnaasaannik ilisimasaqalernissaannillu annertuumik qimiatsivigivai.
Mariusip nuliagigaluatalu Nukaaqqap inuunerminni inuiaqatigiinni pingaarutilinnik suleqataasimanerat kinguaavinut ingerlaqqissimasoq takuneqarsinnaavoq. Tassami kinguaavi peqatigiiffilerinermi timersoqatiiffilerinermilu pingaarutilimmik ukiorpassuarni malunnaateqarlutik ulloq manna tikillugu inuiaqatigiinnut annertuumik iluaqutaasumik suleqataapput.
Mariusip toqukkut qimagunnerani ilaqutaasunut misiginneqataanerput matumuuna apuuppara.
Eqqaaneqarnera ataqqinartuuli.
