Imeqarfimmik imeqarfiullu killeqarfianik ukiuni amerlasoorpassuarni avatangiisinik misissuilluni suliaqarsimanerup maannakkut akuerineqarluni naammassineqarnera Borgmesterip Malik Berthelsen-ip nuannaarutigaa. Nunani issittuni allani imeqarfiit imeqarfiillu killeqarfii sinerlugit motorilinnik angalanissamut periarfissaqartut takusarpagut, taamaattumik maani Sisimiuni tamanna aamma periarfissaalermat nuannersuuvoq.
ASN-imik akuersissuteqarneq 2020-mi aqquserngup ilaanut siullermut ASN-mik aammalu 2020-21-mi ingerlaarfimmi tassani ATV-nut aqqummik sanaartornermik malitseqartinneqarpoq. Sisimiut Kangerlussuullu akornanni ATV-nut aqqut tamakkiisoq ukiup tulliani naammassineqassasoq naatsorsuutigineqarpoq, Kangerlussuarmiillu immikkoortoq siulleq aasaq manna kingusinnerusukkut ammarneqassalluni.
Taamaattorli Malik Berthelsen naqissusiivoq, ATV-nut aqqut anguniagavimmut tassalu Sisimiut Kangerlussuullu akornanni aqqusinermut sioraasumut alloriarneriinnaasoq. Aqqusineq sioraasoq 2021-mi Namminersorlutik Oqartussat siunnersortaannit Oxford Global Projects-imit inuiaqatigiinnut imminut akilersinnaasutut nalilerneqarpoq. ”ASN-imik akuersissut aamma imeqarfiup killeqarfiani immikkut akuersissuteqarneq, inuussutissarsiornerup ineriartortinneqarneranut aamma imermik imersinnaasatsinnik illersuinerup ingerlaqatigiissinnaanerannut assersuutissaqqissutut Avatangiisinut Naalakkersuisup oqaaserisaanut isumaqataavunga aammalu Qeqqata Kommuniani takornariaqarnermi inuussutissarsiutinillu ineriartortitsinissami tamaviaaruteqarnerput pillugu Naalakkersuisut tapersersuillutik suliaqarsimanerannut qujassuteqarfigiumavakka. Aqqusineq sioraasoq qanittukkut piviusunngortissinnaagipput neriunaateqarluarpoq, tamannalu pillugu Namminersorlutik Oqartussanik pivisunngortitsinissaq pillugu isumaqatiginninniarnissamut qilanaarpunga," Malik Berthelsen naggasiivoq.