Hans Christian Sværd kommunimi pissutsinik ilisimaarinnilluartuuvoq, pisortaanerup sulisuinut pisortaasimanermini aqutsineq misilittagaqarfigivaa. Nunaqarfiit allaffissornikkut ingerlaneri tigummivai, atorfillit taamatullu innuttaasunik sullissiviit kiisalu inuussutissarsiornikkut kommunip ineriartorneranut tunngasut akisussaaffigisimallugit, ukiorpaaluillu massakkut aalajaalluni atorfimminiippoq, pisortaaninngortartunullu siunnersortitut ataqatigiissaarisutullu inissisimasarluni.
Sulisunik malinnaatitsinerunissaq pisariaqartoq
Kommunimi qanimut suleqatigiinnerup pingaaruteqarnera Hans Christian Sværdip qinnuteqaatimini tunngavilersorlugu ersersippaa, ilaatigullu sulisunut malinnaatitsinerunissaq pisariaqartoq tikkuarpaa.
”Hans Christian Sværd kommunimi sulinermini ulluinnarni qullersat qanimut, ukiuni arlalinni suleqatigisareerpai, taamaasilluni Qeqqata kommunia ilisimasaqarfigilluareerlugu aammalu ullumikkut akisussaaffimmini pisortaanerugallartutullu atuuffeqartarnermini aqutsisinnaalluarnini akisussaaffimmillu kivitsisinnaanini takutittareermagu toqqarparput”, Borgmesteri Malik Berthelsen oqarpoq.
”Kommunimi pisortaanissatut toqqarneqarninnut maniguuppunga, qilanaarpungalu kommunabestyrelsimi politikkikkut anguniakkat aallartinneqarsimasut suliarinissaanut. Pisortaanerup sulisuanut pisortatut ukiunut qulingiluanngulersuni atorfeqarninni anguniakkat amerlasuut, ilaatigut pilersaarusiornermi periusissiat allallu suliniutit pingaarutillit suleqataaffigisimavakka. Taamaattumik pissanganarpoq nerriviup illuatungaanit kommunalbestyrelsip anguniagassatut aallartitaat malinnaaffiginissai. Aammattaaq neriuutigaara kommunip, kommunimilu sulisut atugarissaarnissaat ineriartortitseqataaffigissallugu”, Hans Christian sværd oqarpoq.
Hans Christian Sværd novembarip 15-at aallarnerfigalugu Qeqqata Kommuniani Pisortaanertut atorfeqalissaaq.