Qeqqata Kommunia, Paarisa aamma Kalaallit Nunaanni inuit peqqissusaannik ilisimasaqarfik suleqatigiillutik nunat tamalaat ilisimatusarlutik suliniutaat (HBSC) ukioq allortarlugu Qeqqata kommuniani ingerlattarpaat.
Qeqqata kommuniani atuarfinni tamani meeqqat 5. klassimiit 10. klassimut apersornerisa inerneri saqqummerput. Ukiulli siuliinnut siuariaatit ilaat tassaavoq Qeqqata Kommuniani atuartunit tamanit 452-iusunit 341-t, procentinngorlugu 75 procentii ataqatigiinnerminnik nuannarisaqarnerat. Atuarfik Kilaaseeqqamit inernerit atuartunit 9.- 10. klassinit inerniliunneqartut maluginiagassartaqarput, tassani atuartut 95 procentii ataqatigiinnerminnik nuannarinnimmata. Maluginiagassat nuannersut aamma ilagivaat atuartut amerlanerpaartaasa atuarnerminnik nuannarinnillutillu ilinniartitsisuminniillu pitsaasumik atassuteqartutut naliliisimanerat.
Taamaakkaluartoq aamma ernumanartunik assigiinngitsunik nalunaarusiami takussutissaqarpoq. Soorlu atuartut affaasa missaat qinngasaarneqarsimanerminnik misigisimanerat aammalu 9.-10. klassini atuartut 41%-ii atuartussaatillutik nal. 23:00-ip kingorna kingusinnerusukkulluunniit aatsaat innartarnerat.
Misissuinerup siunertaraa meeqqat atuartut peqqissusaat, atugarissaarnerat aamma peqqinnissakkut pissusilersuutaasa piffissap sivisunerusup ingerlanerani malinnaaffiginissaat.
Tassani anguniagaalluni paasissutissat misissuinerni pissarsiarineqartut kommunimi aamma atuarfiup siulersuisuini aalajangiisartunut ingerlateqqinneqartarnissaat, taamaaliornikkut misissuinermi inerniliussat sumiiffimmi peqqissutsimik siuarsaalluni suliniutinut atorneqarsinnaallutik.
Nalunaarusiaq paasissutissanik soqutiginartunik assigiinngitsunik imaqartoq annertunerusumik uani atuarneqarsinnaavoq, taakkua ataasiakkaarlugit qulequtsersugaapput imaallutik:
Atuarfik Kilaaseeraq
Minngortuunnguup Atuarfia
Nalunnguarfiup Atuarfia
Qeqqata Kommuniani nalunaarusiaq
Ilaquttanut atassuteqarneq aamma atoqateqaqqaarneq
Sunngiffik aamma eqqarsartaatsikkut peqqissuseq
Peqqissuseq, nerisarisartakkat aamma timigissartarneq
Nikotinitalimmik sanaat
Aanngajaarniutit
Atuarfik
Ersiutit aamma peqqinnissakkut pissusilersuutit