Emma Jensen, Qeqqata Kommuniani sianertunik nuutsitsisarfimmi sulisoq, ukiuni 40-ni atorfeqarsimanermini dronning-ip nersornaasiuttagaanik sølv-isumik tallimanngormat ualikkut nersornaaserneqarpoq.
Sisimiuni kommunip allaffiani persuarsiutigineqarluni nersornaat borgmester Malik Berthelsen-imit tunniunneqarpoq. Berthelsen ilaatigut oqarpoq:
- Emma siullermik Sisimiut Kommunerisimasaani, kingornalu Qeqqata Kommuniani ukiuni 40-ni sulilluni, borgmesterit arfineq-marluk ataanni sulivoq. Tamanna immikkuullarilluinnarpoq – minnerunngitsumik ullutsinni suut tamarmik allanngoriartornerini immikkuullarilluinnarluni. Ukiuni taamak amerlatigisuni kommunip avammut kiinarisimavaatit, tassa kommunimut sianeraanni illit siullerpaamik attavigineqartarputit. Inuit ikinnerpaat suliffimmi ataasiinnarmi ukiuni 40-ni sulisinnaasarput, illilli tamanit iluarisimaarineqarluartumik tamanna angusimavat. Upperilluinnarparput illit Kalaallit Nunaanni sivisunerpaamik omstillingimi sulisuusimassasutit.
Sulisutut tatiginartutut aalajaatsutullu ilisimasarilersimavakkit, arlalitsigut kommunimi sulisunut maligassiuisuusoq. Qaammatit marlussuit qaangiummata ukiuni 40-ni sulisimaninnut atatillugu malunnartitsigatta, Sulisoqarnermut pisortatta erseqqissaatigaa, ukiut ingerlanerini ikittuinnarnik napparsimasarsimagavit, kommunip suliffitsialaaneranut assersuutissaqqissuusutit.
Kunngeqarfik Danmarkimi nersornaatitut tunniuttagaanni, Dronningip nersornaatitut tunniuttagaat pisoqaanersaavoq. Aalajaatsumik sulisimanermut akissarsissutissanngorlugu, 1792-imi pilersinneqarpoq.