Kalaallit Nunaata sinneranut nunarsuarmilu niuffaffinnut Destination Arctic Circle pillugu oqaluttuarnissaq ukkatarisimavarput. Nunap immikkoortuani takornarissanik sammisaqartut amerlanerulernerannik kinguneqarnikuusumik, takornarialerisunik uagut siunnersuinitsinnik piginnaasatigullu ineriartortitsinermik sammisaqarnitsinnik iluaquteqarnikuusunik tamanik oqaloqateqarnissaq ukkatarinikuuarput. Soorluttaaq nunap immikkoortuani pisulluni aqqutit nutaat ilisarnaasersornikuugigut ineriartortillugillu, Kalaallit Nunaannilu "Hiking destination no 1"-itut siuttuunitsinnik annertusaanissamut qilanaarpugut, Arctic Circle Business-imit Juliane Henningsen oqaluttuarpoq.
Nunap immikkoortuatut nukittunerulersitsisussamik nunap immikkoortuanik takornariaqarnermillu ineriartortitsilluni ataatsimoortitsisoq, akimortumik suliniutip ilagigaa, atuilluartuusumik takornariaqarnermik toqqaanissamut Qeqqata Kommuniani pisortaanerup tullia Laust Løgstrup kajumigisimavaa. Soorlu ilaatigut Kangerlussuarmi ikaarsaarfimmik, amerikamiut oqaluttuarisaanerannik ukkataqarluni Kangerlussuarmik ingerlatitsineq, Maniitsumi InuitArt festival aammalu Itinnermiit ammut Sarfannguit tungaanut Sisimiunullu pisulluni aqqutaanik ilisarnaasersuinissaq kivissinnaasimavaa, aammali takornariaqarnermik ineriartortitsinermi nunap immikkoortuani nunaqarfiit akuutinneqarnissaat.
Suliniut ineriartorsimavoq suliaqartunillu amerlasuunik akuutitsisimavoq.
Ukiumi atuilluartuunissamik suliniutitsialak Qeqqata Kommuniata atuilluartuunissamik periusissaata ilagivaa, tassani anguniagaavoq, 2020-mi Issittumi kommuni maligassiuisuussasoq. Atuilluartuunissakkut periusissakkut Qeqqata Kommuniata kissaatigivaa, kinguaariinnut tullinnguuttunut inuiaqatigiit tiguneraniit pitsaanerusumik qimatsiffigineqarnissaat.
*assip oqaasertaa: ACB-mi suleqataasut akissarsiamik tigusisut tassaapput, Jesper Schrøder destination manager, Susanne Høegh suliniutini suleqataasoq, Steffen Heilmann suliniutini suleqataasoq aamma Juliane Henningsen pisortaaneq diplom pissarsiaat ilanngullugu takuneqarsinnaapput.
