Kangerlussuarmi iluaqutit
Niels-Erik Lund Malik Berthelsenimut allakkiamini allappoq, Kangerlussuarmi silap allanngujuinnera 99 procenti sinneqarneratigut kiisalu Ilulissat Kangianut, Kalaallit Nunaannilu illoqarfiit annersaasa aappaanut qaninneratigut, umiarsuarnik takornariartaatilerisut Kangerlussuami umiarsualivimmi takornarissanik paarlaassivissatut piukkunnarluartoq. Mittarfimmi silap allanngujuinnera 100 procentingajammiissimanngikkaluarpat, aningaasartuutit ajornartorsiutillu umiarsuarnik takornariartaatilerisut nalaatassaralui patsisaallutik, umiarsuarnik takornariartaatilerisut takornarissanik paarlaassinissaannut akimmiffeqassagaluarput.
Niels-Erik Lund ilanngullugu allappoq, Kangerlussuaq Kalaallit Nunaanni ornigarneqarnerpaat ilagigaat, Kalaallit Nunaannullu angalanianut tunuliaqutaasoq. Sermersuamukarsinnaaneq pinngortitamiissinnaanerlu kiisalu UNESCO-qarfinngorlaaq ornigarneqartarneranut patsisaapput.
Niels-Erik Lund-ip oqaatigaa, nunanut eqqaamiunut sanilliullugu Kalaallit Nunaanni mittarfinnut akitsuutit qaffasinnerujusuussut, taamaattumillu umiarsuarnik takornariartaatinut ilaallutik takornarissanik paarlaassuineq annertusinnaanerugaluartoq
Sunstone Ships
Sunstone Ships qulingiluanik umiarsuarnik takornariartaateqarpoq, taakkunanngalu amerlanersaat Kangerlussuarmi umiarsualivik takornarissanik paarlaassuiffigalugu Issittup imartaani takornariartitsisarlutik. Taakkunannga tallimat Kalaallit Nunaata imartaani 2018-imi angalasimapput. Sunstone Ships-ip umiarsui takornariartaatit Kalaallit Nunaanni umiarsualivinni 104-riarlutik talissimapput. Taakkunannga qulit Kangerlussuarmi takornarissanik paarlaassillutik Kangerlussuarmut talissimapput.
Taamaalilluni umiarsuit takornariartaatileqatigiit akornanni, Sunstone Ships kalaallit aningaasaqarnerannut akiliuteqarnerpaapput. Umiarsuit takornariartaatit umiarsualivinnut akitsuutinut akiliutaat kiisalu selskabit sulisuisalu akileraarutinut akiliutaannit isertitat nunatta karsianut nakkartarput. Umiarsuarnut takornariartaatinut ilaallutik takornarissat paarlaannerini mittarfinnut akitsuutit nunatta karsianut aamma nakkartarput.
Kangerlussuarmi umiarsualivik nutaaq
Nunat assigiinngitsut akornanni umiarsuarnik takornariartaatilerisut annertuut ilaasa Sunstone Ships-ip, Kangerlussuup iluaqutaani taamak ersaritsigisumik nalunaaruteqarnera Arctic Circle Businessimi siulittaasup Petrus Olsvig-Kleistip alutoraa. Umiarsuit takornariartaatit amerlanerusut Kalaallit Nunaannut tikittalerniassammata, Namminersorlutik Oqartussat Kangerlussuarmi piaarnerpaamik nutaamik umiarsualiviliortitsisariaqarnera tamanit takuneqarsinnaavoq. Kalaallit Nunaanni inuutissarsiorfiusunut, nunattalumi karsianut nuannaarutaasumik illoqarfinnut nunaqarfinnullu takornariaqartitsissaaq, Petrus Olsvig-Kleist oqarpoq.
Ulluni makkunani nalunaarutigineqallattaasut Qeqqata Kommuniani borgmester Malik Berthelsenip nuannaarutigai. Danmarkimi Amerikkamilu sakkutuut mittarfimmik isumannaatsumik atorfissaqartitsinerat pillugu siullermik Danmarkimi Illersornissaqarfik nalunaaruteqariarami, massakkullu nunat assigiinngitsut akornanni umiarsuarnik takornariartaatilerisup Kangerlussuarmik unnersiutiginnilluni. Kangerlussuarmi periarfissat pillugit Kalaallit Nunaanni nassueruteqarnissaat amigaatigiinnalerparput, Malik Berthelsen naggasiivoq.
