Kangerlussuarmi biilinik innaallagissamoortunut sukkaniunneq

Formula E ukiut tallimat ingerlaneranni ukiumut 14-eriarluni sukkaniuffiusarluni, Formula 1-imit tusaamasanik sukkaniuttoqarluni minnerunngitsumillu TV-kkut 300 millioninik isiginnaartartoqarluni annertoorujussuarmik iluatsinnikuuvoq. Nittartakkakkut inuit attaveqaataanni inuusuttunut ingerlaavartumik soqutiginarsaasarnermut Formula E akissarsitinneqartarnikuuvoq. Aammattaaq Leornardo DiCaprio, Richard Branson, Alain Prost aammalu biililiorfiit anginerpaat arlallit Formula E teams-imik piginneqataanngikkunik aningaasaliisuunerat iluaqutaavoq.

Kangerlussuarmi EXTREME E
2021-imi EXTREME E - sukkaniuttaqattaartitsinerit nutaat aallartissavaat, aallaqqaammullu ukiumi tassani sukkaniunnerit tallimaannaassallutik. Sukkaniunnerit tallimat tamarmik, silaannaap allanngoriartornerinik takussutissaqarfinni ingerlanneqartassapput. Kangerlussuarmi sermersuaq aakkiartortoq takuneqarsinnaavoq. Amazonip orpippassuaqarfiani orpippassuarnik piiaaneq ikuallannerillu, Himalaya qaqqartaani sermit uukkartartut aakkiartortut, Sahara inoqajuitsortaani panernersuaq siaruaakkiartortoq, indiallu imartaani nunat pukkitsoqarfiit qeqertallu immap qaffakkiartornera ilutigalugu tammariartortut. TV-kkut isiginnaartartut 200 millioniunissaat EXTREME E-mit naatsorsuutigineqarpoq, taamaattumik annertoorujussuarmik soqutigineqarpoq.

Sukkaniuffissatut siullertut Kalaallit Nunaat tallimanngormat tamanut nalunaarutigineqarpoq, tamanallu nunarsuup sinnerani motorilinnik timersornermi nittartakkani tamani nutaarsiassaalluni. Namminersorlutik Oqartussat Kommunilu sukkasuumik qanimullu sulisinnaasimaneratigut tamanna iluatsippoq. EXTREME E-mit avatangiisitigut qinnuteqaat Pinngortitamut Avatangiisinullu Naalakkersuisoqarfik peqatigalugu sukkasuumik kommunip suliarisinnaasimavaa, sisamanngormallu borgmesterip tulliata Gideon Lybeth-ip Inuussutissarsiornermut Naalakkersuisoq Jess Svane peqatigalugu, EXTREME E-mik pilersitsisoq Alejandro Agag Kangerlussuarmi tikilluaqquaat.

Kangerlussuarmi biilinik suliffissuaqarneq 
Kangerlussuup Qeqqata Kommuniatalu nunat tamalaat akornanni biililiorfiit taamaattut suliarinissaannut sungiussisimammata, tamanna soorunami iluatsissinnaasimavoq. 2014-imi BMW biilit hybrid-it Kangerlussuarmi misilerarpaat, aammalu 1999-imit 2004 tikillugu Sermersuarmi VW biilinut misileraaveqarnikuulluni. Aammattaaq biililiorfinnit allanit arlalinnit tikeraartoqarnikuuvoq, Semersuup qanittuani Kangerlussuarmi aqqusinernik atuerusuttunik kiisalu Kangerlussuarmi nunat tamalaat ilisimatusarneranni ilisimasaannik periarfissanik takunnittarlutik.

Biilinik hybrid-inik Innaallagissamoortunillu misileraaneq ineriartortitsinerlu allaanngilaq Kangerlussuarmut Kalaallit Nunaannulllu pilersitaq. Kangerlussuaq nunat tamalaanut attavilimmik mittarfeqarlunilu Sermersuarmi pitsaalluinnartumik aqquteqarpoq. Kalaallit Nunaat Sermersuaqarpoq aammalu nunarsuarmi silaannaap allanngoriartornerani qitiulluni. Ilutigitillugu Kalaallit Nunaata aalisarnermit allaanerusumut inuussutissarsiornermik ineriartortitsinerup siammartinneqarnissaanik pisariaqartitsivoq, uanilu Kangerlussuarmi ilisimatusarnermik biilinillu misileraanerup iluani periarfissanik pitsassuarnik peqarpoq.

Sinaakkutissat pitsaasut pisariaqarput
Kangerlussuulli siunissaa pillugu qulakkeerineq amigaataavoq. Innuttaasunuinnaanngitsoq aammali nunarsuarmi ilisimatusartunut aamma nunani tamalaani biililiorfinnut. Qulakkeerineq taanna Namminersorlutik Oqartussat Kommunillu piaartumik pilersittariaqarpaat, taamaalilluta inuussutissarsiorfiit amerlanerit aallartissinnaaniassagatsigit, ingammik Kangerlussuarmi.

Taakku ilagaat Kangerlussuup siunissaa pillugu qulakkeerineq. Alla tassaavoq, attaveqatigiiffinnut aningaasaliineq. Nunap sinnerani mittarfinnut aningaasaliineq assigalugu, Kangerlussuup mittarfiani nutaamik asfalterinissamut aammalu Kangerlussuarmi nutaamik umiarsualiviliinikkut umiarsualivimmi pissutsinik pitsanngorsaanissamik piariaqartitsisoqarpoq. Suliassaq taanna Namminersorlutik Oqartussat Kommunillu ataatsimoorlutik kivittariaqarpaat, taamaalillutik EXTREME E siunissami Kangerlussuarmi ukiut tamaasa innaallagissamoortunik sukkaniunnernik aaqqissuisinnaassajunnarsipput.

Borgmesteri Malik Berthelsen-imit, borgmesterillu tullianiit Gideon Lyberth-imit